तस्वीर: देवकी बिष्ट

१२ वैशाख मध्याह्न लमजुङलाई केन्द्र बनाएर गएको ७.९ रेक्टरस्केलको भूकम्पले विभिन्न स्थानमा क्षति पुर्‍याएको छ ।

काठमाडौंको धरहरा ढल्‍यो
काठमाडौंको सुनधारास्थित धरहरा पूरै ढलेको छ । शनिबार धरहरा चढ्न आएकाहरुमध्ये धेरैको धरहरा भत्कँदा मृत्यु भएको छ । १६७ जना टिकट लिएर धरहरा परिषरभित्र पसेको त्यहाँ रहेका सुरक्षाकर्मीले जानकारी दिए ।

वीर अस्पतालमा दिउँसो तीन बजेसम्म ८६ जनाको शव आइसकेको त्यहाँका निर्देशकले जानकारी दिएका छन् । त्रिवि शिक्षण अस्पतालमा करिब ६० जनाको शव आएको छ भने थप शव र घाइतेहरु आउने क्रम जारी छ ।

वसन्तपुर दरबार क्षेत्र ध्वस्त
काठमाडौंको वसन्तपुस्थित दरबार क्षेत्र पूरै ध्वस्त भएको छ । काष्ठमण्डप र त्यस छेउछाउका संरचना मन्दिरहरु ध्वस्त भएका छन् । तलेजु भवानीको मन्दिर भने केही भएको छैन ।

थापाथलीस्थित कालमोचन मन्दिर पूरै ध्वस्त भएको छ भने त्रिपुरासुन्दरीको मन्दिर पनि ढलेको छ ।

असनक्षेत्रमा ठूलो नोक्सानी भएको छैन । दरबार हाइस्कलुको दक्षिणतर्फको भाग भत्केको छ ।

लमजुङ्को एउटा गाउँ सखाप
लमजुङको धुवाकोट गाउँका सबै करिब ७० घरहरु ध्वस्त भए पनि हताहतीको समाचार आएको छ‌ैन । गोरखामा पनि ठूलो क्षति पुगेको खबर प्राप्त भएको छ । त्यसैगरी पाँचथरमा पनि केही घरहरु भत्केको खबर प्राप्त भएको छ ।

भूकम्पको त्रास सबैतिर व्याप्त छ ।

पाटन दरबार क्षेत्रमा पनि क्षति
पाटन दरबार क्षेत्रका मन्दिरहरु पनि ध्वस्त भएका छन् । कृष्णमन्दिरमा क्षति नपुगे पनि त्यसवरपरका मन्दिरहरु भत्केका छन् । मन्दिर अगाडिको भूपतिन्द्र मल्लको शालिक रहेको स्तम्भ पनि भत्किएको छ ।

भक्तपुरमा पनि क्षति
भक्तपुरमा पनि ठूलो क्षति भएको छ । त्यहाँ करिब ५० जनाको मृत्यु भएको प्रारम्भिक अनुमान छ ।

प्रतिकृया दिनुहोस