सिन्धुपाल्चोकमा भूकम्पका कारण मृत्यु हुनेको सङ्ख्या १ हजार ३०० पुगेको छ ।

भूकम्पका कारण प्रहरीको समेत मृत्यु भएको, प्रहरी चौकी क्षतिग्रस्त भएको र सञ्चार सम्पर्क विच्छेद भएको कारण तथ्याङ्क सङ्कलनमा कठिनाइ भएको प्रमुख जिल्ला अधिकारी कृष्ण ज्ञवालीले जानकारी दिए ।

“हामीलाई अहिले उद्धारको काम गर्न बाहिरबाट ठूलो जनशक्ति आवश्यक छ¬”–उनले भने । सञ्चार सम्पर्क नहुँदा राजनीतिक पार्टीहरुसँग समेत समन्वय गर्न गाह्रो भएको उल्लेख गर्दै प्रजिअ ज्ञवालीले उद्धार गर्न हेलिकप्टर तुरुन्तै चाहिएकोमा जोड दिए ।

उनले सिन्धुपाल्चोकमा रहेका ९० प्रतिशत कच्ची घर ध्वस्त भएको र विस्तृत विवरण आउँन बाँकी रहेको उल्लेख गरे । जिल्लाको बाह्रविसे प्रहरी चौकी क्षतिग्रस्त भएको छ भने गाउँगाउँमा सञ्चार सम्पर्क नहुँदा उद्धार कार्य पूर्णरुपमा प्रभावित भएको छ ।

उद्धारका लागि निजी कम्पनी र भारतीय हेलिकप्टरसमेत प्रयोगमा ल्याइए पनि पर्याप्त र प्रभावकारी हुन सकेको छैन । जिल्लाको जलवीरे, तातोपानी, शेर्पाथाङ, बाँसखर्क, फूलपिङकट्टीलगायत अधिकांश गाविसमा भूकम्पका कारणले ठूलो जनधनको क्षति भएको छ ।

“राहत कहिले आउँछ भन्ने प्रतिक्षामा बसेका छौँ,” प्रजिअ ज्ञवालीले भने ।
युवराज पाण्डे, रासस

प्रतिकृया दिनुहोस