नेपालगञ्जमा १९ कार्तिकमा आयोजित पत्रकार सम्मेलनमा शिक्षामन्त्रीसमेत रहेका एमाओवादी पोलिटब्यूरो सदस्य दिनानाथ शर्माले परिवर्तनका अन्य उपलब्धि सुनिश्चित नभएसम्म आफ्नो दलले कुनै हालतमा सरकार नछाड्ने अडान दोहोर्‍याए । सहमतिका बुँदालाई संविधानको रुपमा घोषणा गर्ने र विवादित विषयमा सहमति भएपछि मात्र सरकार छाड्ने शर्माको भनाई छ ।

नेपाली काँग्रेस र नेकपा एमालेले संविधान निर्माणलाई छोडेर सत्ता परिवर्तनको विषयलाई मात्रै जोड दिएको दाबी गर्दै उनले आफूहरुले सरकार नछाड्ने बताए ।
मन्त्री शर्माले राष्ट्रपति  रामवरण यादवले प्रतिगमनकारी शक्तिलाई बोलाएर प्रतिगमनको षड्यन्त्र गरिरहेको आरोपसमेत लगाएका थिए ।

यसअघि एमाओवादीका अर्का नेता कृष्णबहादुर महराले धुलिखेलमा आयोजित कार्यक्रममा सरकारको नेतृत्व अन्य दललाई हस्तान्तरण नगरिने बताएका थिए ।

मुलुकलाई वर्तमान संकटबाट निकास दिन राष्ट्रिय सहमतिको सरकार गठन गर्नेबारेमा दलहरुबीच हुने गरेका छलफलमा पनि एमाओवादी अध्यक्ष पुष्पकमल दाहालले आफ्नो दलले सरकारको नेतृत्व नछाड्ने अडान राख्दा सहमति बन्न सकिरहेको छैन ।

प्रतिकृया दिनुहोस