सहभागीहरुबीच भाषाको विवाद हुँदा नवलपरासी क्षेत्र नम्बर ५ को सुझाव संकलन कार्य रोकिएको छ ।

नयाँ संविधानको मस्यौदामा सुझाव राख्ने क्रममा हिन्दीमा सुझाव दिएपछि अन्य सहभागीले नेपालीमा बोल्न आग्रह गरेका थिए । यो विवाद बढ्दै गएपछि सुझाव संकलन कार्य नै रोकिएको छ ।

दिउँसो ३ बजे राखिएको कार्यक्रममा यो विवाद बढ्दै गएपछि सुझाव संकलन कार्यक्रम स्थगित गरिएको प्रमुख जिल्ला अधिकारी हरिप्रसाद मैनालीले बताए । मधेश केन्द्रीत दलका नेताहरुले सभासद विक्रम खनाल र सिन्धु जलेसाले कार्यकर्ता ल्याएर हिन्दी बोल्दा विवाद उत्पन्न गराएको आरोप लगाए ।

तर, यो तर्कको सभासद जलेसाले खण्डन गरेकी छिन् । उनले भनिन्, “हामीले जून भाषा बोले पनि सुझाव लिन्छौं, तर कार्यक्रम विथोल्न मनसायबाट उहाँहरु सहभागी हुँदा यस्तो भयो ।” पुनःसुझाव संकलन गर्न अहिले दुवै पक्षबीच बार्ता भइरहेको छ ।

क्षेत्र नम्बर ४ र ६ का लागि आयोजित कार्यक्रममा विरोध भएपनि सुझाव संकलन कार्य भइसकेको छ । क्षेत्र नम्बर १, २ र ३ मा राप्रपा नेपालका कार्यकर्ताले हिन्दुराष्ट्र सहितको संविधान आउनुपर्ने माग गर्दै नाराबाजी गरेका थिए ।

यसपछि, उनीहरुले लिखित सुझाव दिएको राप्रपा नेपालका लोकनाथ लामिछानेले बताए । नेकपा–माओवादीका कार्यकर्ताले समेत सुझाव संकलनमा केही समय अवरोध गरेका थिए ।

-विद्रोही गिरी, नवलपरासी

प्रतिकृया दिनुहोस