महोत्तरीको बर्दिवासमा २५ साउन साँझ बोलबम तिर्थ यात्रु चढेको बस दुर्घटना हुँदा मृत्यु हुनेको सङ्ख्या ८ पुगेको छ । मृतकमध्ये चार जनाको सनाखत भएको छ ।

सनाखत भएकामा महोत्तरीको एरहिया–३ बस्ने मनोज साह, जगदीश साह, मटिहानी–५ बस्ने विवेक मण्डल र धनुषा जिल्लाको जनकपुर उपमहानगरपालिका–५ बस्ने हरि साह हलुवाई रहेको जिल्ला प्रहरी कार्यालय महोत्तरीले जनाएको छ ।

सिन्धुली जिल्लाको लङ्गुरखोला महादेवलाई दर्शन गरी फर्किरहेको बोलबम यात्रु बोकेको ज१ख ५२९ नम्बरको बस बर्दिवास नगरपालिका–५ स्थित भोगटे पुलमा पल्टिँदा सोमबार साँझसम्म ६ जनाको मृत्यु भएको र बर्दिवासस्थित जनसेवा अस्पतालमा राति उपचारको क्रममा थप दुई जनाको मृत्यु भएको प्रहरी नायब उपरीक्षक लोकेन्द्र श्रेष्ठले बताए ।

उक्त दुर्घटनामा ७० जना घाइते भएका छन् । घाइतेमध्ये ६९ जनाको उपचार बर्दिवासस्थित जनसेवा, होप, शुभ स्वस्तिक र बर्दिवास अस्पतालमा उपचार भइरहेको छ भने एकजनाको उपचार भारतको दरभङ्गामा भइरहेको प्रहरीले जनाएको छ ।
ईश्वरचन्द्र झा, जनकपुर

प्रतिकृया दिनुहोस