सुर्खेतमा आज पनि हवाई फायर

अखण्ड मध्यपश्चिम र प्रान्तीय राजधानी सुर्खेत हुनुपर्ने माग गर्दै थालिएको आन्दोलनले हिंसात्मक रुप लिँदा आज २६ साउन पनि सुर्खेतमा प्रहरीले हवाई फायर गरेको छ ।

२५ साउनदिख जारी आन्दोलनले हिंसात्मक रुप लिएपछि आन्दोलनलाई नियन्त्रणमा लिन प्रहरीले हवाई फायर गरेको प्रमुख जिल्ला अधिकारीले बताएका छन् । आन्दोलनलाई नियन्त्रणमा लिन प्रहरीले दर्जनौं राउण्ड अश्रुग्यास समेत प्रहार गरेको छ ।

प्रमुख जिल्ला अधिकारी बलदेव गौतमले आन्दोलन उग्र बनेपछि नियन्त्रणमा लिन हवाई फायरिङ गरिएको जानकारी दिए ।
सुर्खेतको स्थिति निकै तनावग्रस्त रहेको तर आफूले गोली चलाउने आदेश नभई हवाई फायरिङको मात्रै आदेश दिएको उनको भनाई छ ।

अहिले सयौँको सङ्ख्यामा आन्दोलनकारी प्रदर्शनमा उत्रिएका छन् । प्रदर्शनका क्रममा स्थानीय मङ्गलगढीमा प्रहरी र आन्दोलनकारी झडप भइरहेको छ ।

सुर्खेतवासीले मध्यपश्चिम विकास क्षेत्रलाई विभाजित गरी सुर्खेत, दैलेख र जाजरकोटलाई सुदूरपश्चिम क्षेत्रमा गाभिएको विरोधमा बन्द आह्वान गरेका हुन् ।