नेपाल आदिवासी जनजाति महासंघका महासचिव पेम्बा भोटेले नयाँ संविधानको विधेयकमा दर्ता गरिएको संशोधन प्रस्ताव संविधान रोक्नका लागि नभएको बताएका छन् ।

उनले विधेयकमा असहमति जनाउँदै संशोधनको प्रस्ताव दर्ता गरिएको भएपनि संविधान निर्माण प्रक्रियालाई रोक्नेगरी नआएको बताए । उनले हिमालखबरसँग भने, “आदिवासी जनजातिको मागहरु संविधानसभामा पेश गरेका छौं, तर संविधान निर्माण प्रक्रिया रोक्नु हुँदैन भन्नेमा सचेत छौं ।”

उनले नयाँ संविधान उत्पीडित वर्ग, जाति, क्षेत्र र लिङ्गका लागि बढी आवश्यक भएकाले तत्काल जारी गर्नुपर्ने पक्षमा महासंघ रहेको बताए । उनले भने, “असहमतिसहित नयाँ संविधानमा हस्ताक्षर गर्छौ ।”

पहिलो संविधानसभाको असफलताबाट सिक्दै जनजातिको अधिकतम अजेण्डा नयाँ संविधानमा समेट्नेगरी संविधान जारी गर्नेतर्फ जोड दिने उनले बताए । २६ जना मनोनित सभासदमा एमाले कोटाबाट परेका भोटेले पार्टीको निर्देशन पालना गर्ने बताए । उनले भने, “महासंघको महासचिव भएकाले यो प्रस्ताव पेश गरेको हुँ, संविधान निर्माणमा अवरोध हुन दिन्न ।”

प्रतिकृया दिनुहोस