विराटनगर भन्सार कार्यालय नजिक रहेका प्रहरीलाई आन्दोलनरत मधेसी मोर्चाका कार्यकर्ताले जलाउने प्रयास गरेपछि सो स्थान भन्दा तीन किलोमिटर पूर्वमा रहेको बुधनगर प्रहरी चौकी खाली गराइएको छ ।

२०६३ सालको मधेश आन्दोलनमा बुधनगर प्रहरी चौकीका सई नरेशजंग कार्कीलाई आन्दोलनकारीले कार्यालय बाहिर निकालेर कुटपिट गरी मारेका थिए । पुनः त्यस्तै घटनाको हुन नदिन मोरङ प्रहरीले २३ भदौमा बुधनगर चौकीका प्रहरीलाई निकालेर खाली गराएको हो ।

प्रहरीले चौकी छाडेपछि आन्दोलनकारीले चौकीमा रहेको हावा महलमा आगो लगाएका छन् ।

बजार बन्द गराउंदै हिंडेका आन्दोलनकारीलाई २३ भदौ विहान विराटनगर–२० स्थित भट्टीमोडमा स्थानीयले प्रतिकार गरेपछि दुई जना घाइते भएका छन् ।

प्रतिकारपछि आक्रमक भएका आन्दोलनकारीले भन्सार कार्यालयमा रहेको प्रहरी पोष्टमा आगो लगाई दुई सहायक निरीक्षक र तीन जना सशस्त्र प्रहरी जवान गरी पाँच सुरक्षाकर्मीलाई पेट्रोल छर्केर आगो लगाउन खोजेपछि हवाई फायर गरिएको प्रहरी नायव उपरीक्षक प्रमोद खरेलले बताए ।

“प्रहरीले फायर नगरेको भए पाँच जना प्रहरीलाई जलाएरै मार्ने थिए,” खरेलले भने ।

२०६३ सालको आन्दोलनमा सोही स्थानमा स्थानीयले प्रतिकार गर्दा एक आन्दोलनकारीको मृत्यु हुनुका साथै एक जना गम्भीर घाइते भएका थिए ।

सशस्त्र प्रहरीले १० र नेपाल प्रहरीले ७ राउण्ड हवाई फायर गरेको उनले जानकारी दिए ।

सञ्चारकर्मीमाथि आक्रमण
भन्सार क्षेत्रमा भएको झडपको समाचार संकलन गर्न गएका दुई सञ्चारकर्मीलाई आन्दोलनकारीले कुटपिट गरी उनीहरु चढेको को ८ प २२३९ नम्बरको मोटरसाइकलमा आगो लगाएका छन् ।

कुटपिटबाट पत्रकारद्वय नविन कर्ण र जितेन्द्र ठाकुर सामान्य घाइते छन् ।

यस्तै संचारकर्मीहरु खिलानाथ ढकाल, दिनेश खड्का र अनुज रायामाझीलाई आन्दोलनकारीको घेराबाट निकालेर उद्धार गरिएको प्रहरीले जनाएको छ ।
कमल रिमाल, विराटनगर

प्रतिकृया दिनुहोस