मोहन वैद्य नेतृत्वको माओवादीका केन्द्रीय सचिवालय सदस्य देब गुरुङले मधेशी मोर्चाको मागमध्ये दुई वटा माग पूरा गर्नै नहुने बताएका छन् ।

१९ मंसीर बिहान पाल्पाको तानसेनमा सञ्चारकर्मीसँग कुरा गर्दै नेता गुरुङले जनसंख्याको आधारमा निर्वाचन क्षेत्र निर्धारण र अंगिकृत नागरिकता पाएकाले संवैधानिक निकायमा नियुक्ति पाउनु पर्ने दुई मागहरु मुलुकको हितमा नरहेको दाबी गरेका हुन् ।

नेपाल–भारत खुला सीमाबाट भारतीयहरुको नेपाल प्रवेश ह्वारह्वारती हुने र नागरिकता प्राप्त गर्न भारतीयलाई सजिलो भएकाले यी दूई माग पूरा हुँदा भोली मुलुकलाई अप्ठेरो पर्ने गुरुङको ठहर छ ।

अर्को प्रसंगमा गुरुङले एमाओवादीसँग तत्कालै एकता सम्भव नभएको बताए ।

उनले एमाओवादी अध्यक्ष पुष्पकमल दाहाल सत्ता र शक्तिको लोभमा रुमलिएको भन्दै ओली सरकार असफल भएपछि आफ्नो पालो आउला भनी कुरेर बसेको आरोप लगाए ।

उनले एमाओवादी एमालेमा बिलिन हुनेसक्ने समेत दाबी गरे ।

गुरुङले पूर्व एमाओवादी नेता बाबुराम भट्टराईले पुँजिवादी पार्टी निर्माणको क्रममा रहेको समेत दाबी गरे ।
देव पचभैया, पाल्पा

प्रतिकृया दिनुहोस