कांग्रेस केन्द्रीय कार्यसमितिको २७ माघमा बसेको बैठकले वर्तमान सरकार राष्ट्रिय सहमतिको बाधक भएको भन्दै जनपरिचालनबाटै सरकार विस्थापन गर्ने निर्णय गरिएको  पार्टीका प्रवक्ता दिलेन्द्रप्रसाद बडुले जानकारी दिए ।  बैठकले यही माघको दोस्रो सातासम्म राष्ट्रिय सहमति बन्न सके आगामी जेठको दोस्रो सातासम्म संविधानसभाको निर्वाचन सम्पन्न गर्न सकिने निष्कर्षसमेत निकालेको छ ।

सरकार र सरकारको नेतृत्व गरिरहेको एकीकृत नेकपा माओवादी र संयुक्त लोकतान्त्रिक मधेसी मोर्चा सहमतिका लागि तयार नदेखिएको भन्दै कांग्रेसले सरकारविरुद्ध व्यापक जनपरिचालन गर्ने ठहर गरेको प्रवक्ता बडुले जानकारी दिए । उनले भने, “एमाओवादी बाह्रबुँदे सहमतिलगायत दलहरूबीच विगतमा भएको सहमति र सम्झौतालाई लत्याएर एकलौटी ढङ्गले अगाडि बढ्न लागेको ठहर बैठकले गरेको छ, उसलाई सहमतिमा ल्याउन समेत जनपरिचालन नै उत्तम विकल्प भएको ठहर गरिएको छ ।”

यसैगरी बैठकको नेपाल महिला सङ्घ र नेपाल तरुण दलका विधान परिमार्जनसहित पारित गरेको छ । यस्तै नेपाल आदिवासी जनजाति सङ्घको विधान पनि परिमार्जनसहित पारित गरिएको छ ।

नेपाल आदिवासी–जनजाति सङ्घलगायत विभिन्न संस्थाले ज्ञापनपत्रमार्फत प्रस्तुत गरेको सुझावलाई समावेश गरी विधान पारित गरिएको हो । गत  असार ७ गते तत्कालीन केन्द्रीय सदस्य भीमबहादुर तामाङको संयोजकत्वमा गठित सुझाव समितिले पेस गरेको प्रतिवेदनसमेत पारित गरी सो प्रतिवेदनको स्वामित्व ग्रहण केन्द्रीय समितिले गरेको  छ । यस्तै नेपाल दलित सङ्घको म्याद आगामी फागुन मसान्तसम्म थप गरिएको छ ।

प्रतिकृया दिनुहोस