निर्वाचन आयोगले १५ चैतमा आफ्नै कार्यलयमा प्रमुख चार दलका नेताहरुस“गको छलफलमा निर्वाचन सम्पन्न गर्न आवश्यक ऐन, नियम तथा कानुनहरु संशोधन गरेर निर्वाचन प्रक्रियालाई सहज बनाउन आग्रह गरेको छ ।

एमाओवादी, नेपाली कांग्रेस, नेकपा एमाले र मधेशी मोर्चाका नेताहरुसँगको छलफलमा आयोगले मतदता नामावली संकलनको काममा केही दलले बाधा पुर्‍याएकाले ती दलहरुसँग वार्ता गरी नामावली संकलनका लागि सहज वातावरण बनाइदिन पनि आग्रह गरेको छ ।

बैठकपछि सञ्चारकर्मीहरुसँग कुरा गर्दै नेकपा एमालेका नेता रघुजी पन्तले बाधा अड्काउ फुकाउ गर्न दलहरुले गरेको सहमतिका आधारमा आयोगले निर्वाचनका लागि सहज वातावरण बनाउन आग्रह गरेको जानकारी दिए ।

आयोगका प्रमुख आयुक्त नीलकण्ठ उप्रेतीले मतदाता नामावली संकलन, नागरिकता वितरण लगायतको वातावरण बनाउन दलहरुलाई आग्रह गरेको जानकारी दिए ।

यसैबीच गृहसचिव नवीन घिमिरेले फोटोसहितको नामावली संकलन गर्ने काम सञ्चारमाध्यममा आएजस्तो नरोकिएको दाबी गरे । सचिव घिमिरेले सुरक्षाकर्मी बढाएर भएपनि सरकारले आयोगको कामलाई सहयोग गरिरहेको बताएका थिए ।

आयोगले १६ चैत दलहरुसँग फेरि छलफल गरेर निर्वाचनको मिति सिफारिस गर्ने जनाएको छ ।

प्रतिकृया दिनुहोस