बेहोस अवस्थामा भारतको नयाँ दिल्ली नजिकैको मेदान्त अस्पतालमा भर्ना भएका कांग्रेस नेता चक्रप्रसाद बास्तोलाको स्वास्थ्य अवस्थामा खासै सुधार नआएपछि उनलाई १६ चैतमा काठमाडौ फिर्ता ल्याइने भएको छ ।

वास्तोलालाई एयर एम्बुलेन्सद्वारा काठमाडौँ ल्याईने र काठमाडौँस्थित नर्भिक अस्पतालमा राखिने नेपाली कांग्रेसले जनाएको छ ।

वास्तोला होसमा फर्कने सम्भावना कम रहेको र अहिले उनको हेरचाह मात्रै भइरहेकोले नेपालकै अस्पतालमा राखेर पनि आवश्यक उपचार र हेरचाह गर्न सकिने भएको चिकित्सकलाई उद्धृत गर्दै वास्तोलाका आफन्तले वताएका छन् ।

१४ पुसमा मोरङको विराट चोकमा आयोजित एक कार्यक्रममा अचेत भएका वास्तोलाको सिलगुडीस्थित न्यूरो अस्पतालमा मस्तिष्कको शल्यक्रिया गरिएको थियो । त्यसलगत्तै उनलाई दिल्ली निजक गुडगावँस्थित मेदान्त अस्पतालमा लगिएको थियो ।

अहिले उनको जीवन निरन्तरताका लागि आवश्यक शरीरको तापमान, रक्तचाप, मुटुको चाल, श्वासप्रंश्वास लगायतका अवस्था स्थिर रहे पनि होसमा भने आउन नसकेको अस्पतालको भनाई छ । यस्तो अवस्थामा उनलाई हेरचाह, फिजियोथेरापी र अन्य आवश्यक उपचार नेपालमै हुनसक्ने भएकोले नेपाल ल्याउन लागिएको कांग्रेस प्रवक्ता दिलेन्द्र प्रसाद बडुले जानकारी दिए ।

प्रतिकृया दिनुहोस