एपेन्डिक्सको अप्रेशन गरिएका विराटनगर–१८ का २७ वर्षीय हेमनारायण यादवको २० चैतमा मृत्यु भएपछि कोशी अञ्चल अस्पतालका चिकित्सहरुलाई मृतकका आफन्तले मध्यरातसम्म एउटा कोठामा थुनेका छन् ।

क्षतिपुर्तिको माग गर्दै मृतकका आफन्तले अस्पतालका प्रमुख डा. उमाकान्त झा, सर्जन नारायण बस्नेतलागायतलाई राति १२ बजेसम्म थुनेका थिए । २१ चैत बिहानसम्म पनि यादवको शव अस्पतालबाट उठाइएको छैन ।

राति १२ बजे प्रहरीले अस्पतालबाट सुरक्षा दिएर चिकित्सकलाई बाहिर निकालेको थियो । अस्पतालका कर्मचारी नवराज लुइंटेलले अस्पतालमा डाक्टर र कर्मचारीले काम गर्ने वातावरण नरहेको बताए । उनका अनुसार, मृतककी श्रीमतीलाई अस्पतालमा जागिर दिने सम्बन्धमा भने मन्त्रालयमा कुरा भई रहेको छ ।

अस्पताल प्रशासनले मृतक परिवारलाई क्षतिपुर्ति दिन नसक्ने बताएपछि अस्पतालमा बेलुका तनाव भएको थियो । सर्जन बस्नेतलाई मृतकका आफन्तले हातपातसमेत गरेका छन् ।

अप्रेशन गरेका बिरामीको हृदयघातका कारण मृत्यु भएको र अप्रेशनअघिको बेहोस गर्ने औषधिको असरले त्यसो भएको हुनसक्ने बस्नेतको भनाई छ ।

कमल रिमाल/विराटनगर

प्रतिकृया दिनुहोस