आगामी निर्वाचनको विरोध गरिरहेका दलहरुसँग वार्ता गरेर उनीहरुलाई पनि चुनावी प्रक्रियामा सहभागी गराउने उद्देश्यले प्रमुख दलहरुले बोलाएको बैठकमा नेकपा–माओवादीलगायत असन्तुष्ट साना दल नगएपछि बैठक हुन सकेन ।

बिहान ९ बजेपछि सेना समायोजन समितिको कार्यालय नयाँ बानेश्वरमा हुने भनिएको छलफलमा एमाओवादी, कांग्रेस, एमाले र मधेशी मोर्चाका नेताहरु पुगे पनि नेकपा–माओवादीलगायत साना दलका कोही पनि नगए पछि केहीबेर बसेर ठूला दलका नेताहरु फर्किएका थिए ।

बैठकका लागि नयाँ बानेश्वर पुगेका नेकपा एमालेका उपाध्यक्ष बामदेव गौतमले असंतुष्ट नेताहरुले आन्तरिक गृहकार्य नपुगेर छलफलमा आउन नसकेको जानकारी गराएपछि बैठक स्थगित गरेको जानकारी दिए ।

नेकपा–माओवादीका सचिव देव गुरुङले संविधानसभाको चुनाव गर्ने जस्तो महत्वपूर्ण निर्णय मनोमानी ढंगले गरेकाले त्यो नसच्याएसम्म सरकार वा दलका नेताहरुसँग वार्ता नगर्ने बताए ।

चारदलको सहमति खारेजी नै आफूहरुको शर्त रहेकाले वार्ता गर्नुको औचित्य नभएको माओवादीले बताउँदै आएको छ ।

प्रतिकृया दिनुहोस