१९ बैशाखमा बागलुङमा सरोकारवालाहरुसँगको अन्तरक्रिया कार्यक्रममा बोल्दै प्रमुख निर्वाचन आयुक्त निलकण्ठ उप्रेतीले निर्वाचन सम्बन्धी तयारी अन्तिममा पुगिसकेकाले अब सरकारले छिट्टै निर्वाचनको मिति घोषणा गर्नु पर्ने बताएका छन् ।

उप्रेतीले असहमति टुङ्गाएर सबै दलहरु निर्वाचनमा जानुको विकल्प नभएको भन्दै लोकतन्त्रको संस्थागत विकासका लागि सबैले निर्वाचनमा भाग लिनु जरुरी रहेकोमा जोड दिए ।

“असहमति र विमति हुन सक्छन्, ती सबैलाई हल गरेर निर्वाचनमा जानुबाहेक अरु विकल्प राष्ट्रसामु छैन”, उप्रेतीले भने ।

देशको महत्वपूर्ण संवैधानिक निकाय निर्वाचन आयोगले गर्ने निर्वाचनमा विश्वास गर्न र सहभागी हुन उनले सबै दलसँग आग्रह गरे ।

निर्वाचनसम्बन्धी ऐन कानून पनि छिट्टै आउन लागेको र मुलुक पनि निर्वाचनमा होमिइसकेकाले अब मिति घोषणामा ढिलो गर्न नहुने उप्रेतीको भनाइ थियो ।

आयोगले निर्वाचन तयारीका लागि काम तीव्ररुपमा अघि बढाएको जानकारी दिँदै उप्रेतीले जेठभित्रै मतदाता नामावली सङ्कलनको काम सम्पन्न गर्ने जानकारी दिए ।

आयोगमा हालसम्म एक करोड १३ लाख फोटोसहितको मतदाता नामावली सङ्कलन भइसकेको उप्रेतीको भनाइ थियो ।

प्रतिकृया दिनुहोस