मलेसियाको विपक्षी दलहरुको गठबन्धन ‘एनिथिङ्ग बट युएमएनओ (एबीयू)’ ले सत्तारुढ युनाइटेड मलेज नेशनल अर्गनाइजेशनमाथि आगामी निर्वाचनलाई प्रभाव पार्ने गरी ५० हजार विदेशी श्रमिकहरुलाई नागरिकता प्रदान गरेको आरोप लगाएको छ ।

नेपाल, बंगलादेश र इन्डोनेसियाका श्रमिकहरुलाई भोट हाल्न लगाएर सत्तारुढ दल आफू फेरि सत्तामा पुग्ने षडयन्त्र गरिरहेको एबीयूले दाबी गरेको छ ।

एबीयूले निर्वाचन धाँधलीरहित हुनुपर्ने भन्दै विदेशी श्रमिकहरुलाई मतदानमा सहभागी नहुन चेतावनी समेत दिएको छ । निर्वाचन क्याम्पेनका क्रममा एबीयूले त्यस्ता चेतावनी मुलक पर्चा वितरण गर्नुका साथै भिडियो पनि प्रदर्शन गरिरहेको छ ।

पर्यबेक्षकहरु मलेसियामा करिब २० लाख विदेशी श्रमिकहरु रहेको र निर्वाचनका बेला यही निहुँमा उनीहरुमाथि सांघातिक आक्रमण हुनसक्ने बताउँछन् ।

यसैबीच मलेसियाको प्रहरीले आप्रवासीहरुलाई मतदान नगर्न भन्दै यदि त्यसो गरेको पाइएमा कडा कारवाही गर्ने चेतावनी दिएको छ ।

नेपाली श्रमिकहरुका लागि मलेसिया भारत र साउदी अरबपछि तेस्रो ठूलो रोजगारदाता हो जहाँ करिब डेढ लाख नेपालीहरु कार्यरत छन् ।

प्रतिकृया दिनुहोस