मातातिर्थ औंसीका अवसरमा बराहक्षेत्रस्थित सप्तकोशी नदीमा श्राद्ध गर्न आएका झापा, काकडभिट्टाका ५५ बर्षीय ज्ञाननाथ बास्कोटा, शान्तिनगरका ४० बर्षीय रमेश बास्कोटा र ३५ बर्षीय गोपाल बास्कोटा नदीमा डुबेर बेपत्ता भएको अस्थायी प्रहरी विट बराहक्षेत्रले जानकारी दिएको छ ।

प्रहरी हवल्दार वीरेन्द्र यादवका अनुसार वेपत्ता हुने रमेश र गोपाल दाजुभाई हुन् भने ज्ञाननाथ बास्कोटा उनीहरुका ठूलाबाबु हुन् ।

श्रद्धाको पूजा सकेर कोशीमा पिण्डसँगै बत्ति सेलाउन पुगेको बेला मध्यान्ह १२ बजे तीन जना सप्तकोशीमा बगेको प्रहरी हवल्दार यादवले जानकारी दिए ।

श्राद्ध गर्न झापाबाट २१ जनाको टोली बराहक्षेत्र पुगेको थियो । सप्तकोशीमा बात्ति सेलाउन लागेको बेला शुरुमा ठूलाबाबु ज्ञाननाथ कोशीमा डुबेको बास्कोटा परिवारसँगै बराहक्षेत्र गएका स्थानीय यदु घिमिरे बताए । उनका अनुसार ज्ञाननाथलाई बचाउन पुगेका रमेशलाई पनि नदीले बगाएको थियो भने दुबैलाई बचाउन नदीमा पसेका भाई गोपाल पनि सप्तकोशीमै वेपत्ता भए ।

घिमिरेका अनुसार बास्कोटा परिवारलाई घटना पछि झापा पठाएर केही आफन्तहरु बराहक्षेत्रमा नै बसेका छन् । घटनाबारेमा जानकारी पाएलगत्तै खोजी कार्य शुरु गरेको प्रहरी हवल्दार यादवको भनाई छ ।

सोहन श्रेष्ठ, धरान

प्रतिकृया दिनुहोस