हिउँ पग्लिएर शव उठाउन कठिनाइ भएको तथा खर्च पनि अधिक लाग्ने भएपछि गत जेठको पहिलो हप्ता कञ्चनजङ्घा हिमालमा मरेका आरोहीको शव हिमालमै छोडिने भएको छ ।

कञ्चनजंघा आरोहण गरी फर्कने क्रममा ७४०० मिटरको उचाईमा ४ जेठदेखि हराएका दुई नेपाली, दुई हंगेरी र एक कोरियाली नागरिकको शव ९ जेठमा फेला परेको थियो ।

हिमाल पग्लिएर शव उठाउन समस्या पर्ने र उद्धारका लागि पठाइएको टोली नै जोखिममा पर्ने भएपछि मृतकका आफन्त र आरोहणमा पठाउने टे«किङ एजेन्सीले अब शव नठाउने निधो गरेका हुन् ।

उद्धारमा गएको टोली पनि शव रहेको स्थलमा पुगेर उद्धार गर्न नसक्ने भन्दै फर्किएको छ । “एजेन्सीले हिम्मत पनि गरेको हो, तर उद्धार प्रयास सम्भव भएन”, सेभेन समिट ट्रकिङ एजेन्सीका प्रवन्धक मिङमा शेर्पाले भने ।

उनले मे महिनाको दोस्रो सातादेखि नै हिमालको हिउँ पग्लने क्रम शुरु हुने भएकाले यो उचाईबाट शव निकाल्नु उद्धारकर्ताहरु आफैँका लागि पनि जोखिम हुने बताए । उद्धारकर्ताले नै नसक्ने भनेपछि शव ननिकालिने निर्णय गरिएको प्रवन्धक शेर्पाले जानकारी दिए ।

कञ्चनजङ्घा आरोहणको ४ नं आधार शिविरमा सङ्खुवासभा मकालु–५ बस्ने फुदोर्जी शेर्पा, सङ्खुवासभाकै हटियाखोला–७ बस्ने विवश गुरुङ, हंगेरीयन नागरिक पिटर किस, जेड सोल्ट इरोस र कोरियन नागरिक नामसो पार्कको मृत्यु भएको थियो ।
-रासस

प्रतिकृया दिनुहोस