रिपोर्टर्स क्लब नेपाल दाङले १८ जेठमा तुलसीपुरमा गरेको साक्षात्कार कार्यक्रममा बोल्दै नायक राजेश हमालले मुलुकको समग्र विकास नहुनुमा राजनीतिक नेतृत्व जिम्मेवार रहेको भन्दै मुलुकलाई कुशल नेतृत्वको खाँचो रहेको बताएका छन् ।

हमालले राजनीति देशको मेरुदण्ड भएको चर्चा गर्दै मेरुदण्ड नै ठीक बाटोमा नआएसम्म अन्य क्षेत्रको विकासको कल्पना गर्न नसकिने पनि बताए ।

नेताहरूले विदेशीको उदाहरण दिएर संविधान निर्माण हुन नसकेको भन्दै उनले नेपाली माटो सुहाउँदो र नेपाली जनताका हकअधिकार सुनिश्चत हुने संविधान निर्माण गर्न राजनीतिक दलहरूलाई आग्रह गरे ।

नेपाली जनताले मुलुकमा गणतन्त्र ल्याउन ठूलो क्रान्ति गरेको भए पनि गणतन्त्रको अनुभूति भने गर्न नपाएको भन्दै उनले थपे, “अब जनताले शान्ति र समृद्धि चाहेका छन्, क्रान्ति होइन ।”

नायक हमालले पछिल्लो समयमा नेपाली चलचित्र क्षेत्रको धेरै विकास भएको भन्दै तर चुनौतीहरू पनि प्रशस्तै रहेको बताए । उनले पहिलेको तुलनामा नेपाली मौलिकता र मन छुने चलचित्र नबनेका कारण केही निरासा छाए पनि राम्रो चलचित्र बने नेपाली दर्शकले माया गर्ने बताएका थिए ।

प्रतिकृया दिनुहोस