नेपाल प्रेस युनियन रोल्पाले सदरमुकाम लिबाङमा २२ जेठमा आयोजना गरेको पत्रकार सम्मेलनमा कांग्रेस उपसभापति पौडेलले निर्वाचनको विरोध गर्नेहरुले कि त उपयुक्त विकल्प दिनुपर्ने नभए निर्वाचनमा सहभागी हुनुपर्ने बताएका छन् ।

“विकल्प दिन नसक्ने भए यसैमा आउनु पर्‍यो, अब देशलाई अलमलमा पार्नु हुँदैन,” नेता पौडेलले भने ।

निर्वाचन ऐनसम्बन्धी अध्यादेशका लागि उच्चस्तरीय राजनीतिक समितिले गृहकार्य गरिरहेको भन्दै पौडेलले निर्वाचन ऐन जारी हुने वित्तिकै चुनावको मिति घोषणा हुने दाबी गरे । उनले भने, “हामी जसरी पनि मंसीरको पहिला साता चुनाव गराएर छाड्छौं, देशलाई राजनीतिक निकास र जनतालाई विकास चाहिएको छ ।”

उनले मन्त्रिपरिषद अध्यक्ष खिलराज रेग्मीले प्रधानन्यायाधीश पदबाट राजीनामा दिनु नपर्ने भन्दै राजीनामाले देश अझैं अस्थिरतातिर जाने जिकिर गरे ।

एमाओवादी अध्यक्ष पुष्पकमल दाहाललाई पौडेलले ‘कन्फ्युज्ड मान्छे’ भन्दै थपे, “प्रचण्डजी तपाइँ आफै कन्फ्युज्ड मान्छे हो, जनतालाई पनि कन्फ्युजनमा नपार्नुस । रोल्पा आएर हिंसा त्यागेको घोषणा गर्नुस ।”

हीराबहादुर घर्तीमगर, रोल्पा

प्रतिकृया दिनुहोस