एमाओवादी मुख्यालय पेरिसडाँडा, कोटेश्वरमा ९ असारमा बसेको बैठकले संविधानसभालाई समावेशी बनाउन समानुपातिक तर्फको सिट बढाउनुपर्ने र त्यसका लागि ऐन संशोधन गर्नुपर्ने ठहर गरेको हो । गठबन्धनको बैठकले प्रत्यक्षतर्फको सिट सङ्ख्या ४२ प्रतिशत र समानुपातिकतर्फ ५८ प्रतिशत हुनुपर्ने पहिलेको अडान दोहो¥याउँदै त्यसका लागि ऐन सशोधन गर्नुपर्ने विषयमा छलफल भएको गठबन्धनका प्रवक्ता प्रेमबहादुर सिंहले जानकारी दिए ।

प्रवक्ता सिंहले त्यसका लागि राजनीतिक सहमति पूर्वसर्त भएको र सहमति भए ऐन सशोधन गर्न कुनै समस्या नहुने बताए । सरकारले केही दिन पहिले जारी गरेको ऐनमा प्रत्यक्ष र समानुपातिक ५०–५० प्रतिशत हुने व्यवस्था गरेको छ ।

त्यस्तै बैठकले आगामी ४ मङ्सिरका लागि तोकिएको संविधानसभाको निर्वाचन सफल पार्न सबै राजनीतिक दललाई आह्वान गरेको छ । गठबन्धनको बैठकले सरकारले चुनावको मिति तोकेकोमा स्वागत गर्दै चुनाव सफल पार्न सबै राजनीतिक दलसँग आह्वान गरेको प्रवक्ता सिंहले जानकारी दिए । बैठकले नेकपा–माओवादीका मागका विषयमा छलफल गरेर सहमतिका लागि पहल गर्ने निर्णय गरेको छ ।

त्यस्तै बाहुन क्षत्री, दशनामी सन्यासी, ठुकरीलगायतलाई खस आर्यको रूपमा परिभाषित गरेकामा गठबन्धनले स्वागत गरेको छ । गठबन्धनले बाढीपहिरो पीडितका लागि राहत र पुनःस्थापनाको काममा जुट्न आफ्ना नेता तथा कार्यकर्तालाई निर्देशनसमेत दिएको छ ।

बैठकले बाढीपीडितलाई राहत दिन र पुनःस्थापनाको काम युद्धस्तरमा अगाडि बढाउनसमेत सरकारसँग आग्रह गरेको छ । तीर्थयात्राका लागि भारत गएका नेपाली नागरिक भारतको उत्तराखण्ड राज्यका विभिन्न स्थानमा अलपत्र परेको भन्दै उनीहरूको तत्काल उद्धारका लागि भारत सरकारसँग कूटनीतिक पहल गर्नसमेत बैठकले आग्रह गरेको छ ।

गठबन्धनको बैठकमा पछिल्लो राजनीतिक अवस्था र संविधानसभाको निर्वाचनको तयारीका सम्बन्धमा भइरहेको काम तथा कारबाहीको विषयमा गठबन्धनका संयोजक एवम् अध्यक्ष पुष्पकमल दाहालले जानकारी गराएको प्रवक्ता सिंहले उल्लेख गरे । गठबन्धनको सचिवालयको बैठक बसेर निर्वाचनसम्बन्धी कार्ययोजना तयार पारिने सहमति भएको प्रवक्ता सिंहले बताए ।रासस

प्रतिकृया दिनुहोस