ग्राहकको कपाल काटदै पूर्व ड्राइभर बाबुराम भुसाल ।

गाडी चालक भएर गरी खाएका २९ वर्षीय बावुराम भुसाल केही नयाँ गरौं भन्दै अर्घाखाँची सदरमुकाम सन्धिखर्कमा दुई वर्षदेखि ग्राहकको कपालमा कैंची चलाइरहेका छन् । उनी भन्छन, “यो पेशाबाट म सन्तुष्ट छु ।”

जिल्ला भरमै कपाल काट्ने काम मधेशी मुलका र केही भारतीयहरुले समेत गर्दै आएकोमा भुसालमात्रै अपवाद हुन पुगेका छन् । शुरुमा धेरैले खिसी गरे पनि अहिले आफ्नो कामबाट सवै अचम्म परेको उनले बताए । “ड्राईभर भएर घुमेर खानी बानी लागेको छ, तैले यो काम गर्न सक्दैनस भनेर शुरुमा धेरै साथीहरुले गिज्याए” ,उनले भने ।

सदरमुकाममा ‘आशिष हेअर ड्रेसर’ सञ्चालन गरेका उनले मासिक २५ देखि ३० हजार सम्म कमाउने गरेको सुनाए । “ड्राईभर छँदा मासिक १० देखि १२ हजार सम्म कमाई हुन्थ्यो, दुख पनि उत्तिकै हुन्थ्यो” भुसालले भने, “तर अहिले सजिलै राम्रो आम्दानी भइरहेको छ ।”

दुई वर्ष अघि सदरमुकाममै रहेको एउटा हेअर कटिङ्ग शैलुनमा तीन महिनासम्म तालिम लिएर काम शुरु गरेका भुसालले कुनै पनि पेशालाई जाति, समुदायसँग जोडेर हेर्न नहुने बताए ।

उनको ‘हेअर ड्रेसर’मा विहानदेखि वेलुकासम्म नै ग्राहकहरुको घुइँचो लाग्ने गरेको छ ।
प्रेमनारायण आचार्य, अर्घाखाँची

प्रतिकृया दिनुहोस