उपचारको क्रममा अमेरिकामा रहेका कांग्रेस सभापति कोइरालाले नेपाल–अमेरिका जनसम्पर्क समितिले न्युयोर्कको ज्याक्सन हाइटमा आयोजना गरेको कार्यक्रममा कांग्रेस संघीयता विरोधी नभएको तर जातीय संघीयताको पक्षमा पनि नरहेको पनि स्पष्ट पारेका छन् ।

उनले नेकपा–माओवादी र मधेशी जनअधिकार फोरम नेपाललगायत आन्दोलनरत दलका नेताहरुसँग चुनावमा सहभागी हुनेबारेमा कुराकानी भइरहेको बताउँदै नेपाली जनता पनि निर्वाचनको पक्षमा रहेकाले निर्वाचन हुने कुरामा कुनै शंका नरहेको बताए ।

“आउँदो निर्वाचनमा नेताहरुको वरिपरि घुम्ने र राजधानीमा बस्नेले होइन, जिल्लामा काम गर्ने र क्षेत्रले स्वीकृत गरेर पठाएका उम्मेदवारीलाई पार्टीले टिकट दिनेछ,” एक अर्को प्रसङ्गमा सभापति कोइरालाले भने ।

उक्त कार्यक्रममा नेपालका बाढीपीडितलाई राहत दिनको लागि त्यहाँका काँग्रेस सक्रिय सदस्यले ५० डलर र साधारण सदस्यले इच्छाअनुसार दिने निर्णय भएको छ ।

जिब्रोमा क्यान्सर भएपछि अमेरिकामै शल्यक्रिया गराएका सभापति कोइराला त्यहाँको सोनो क्याटरिङ क्यान्सर अस्पतालमा नियमित स्वास्थ्य परीक्षणका लागि गएका हुन् ।

प्रतिकृया दिनुहोस