चन्दा माग्दै गरेका कार्यकर्ता पक्राउ भएको विरोधमा १६ साउन विहान १० बजेदेखि चितवन बन्दको आह्वान गरेको वाइसिएलले मध्यान्ह १२ बजेपछि  बन्द फिर्ता लिएको छ ।

एक्कासी बन्द गर्दा सर्वसाधारणलाई मर्का परेको भन्दै बन्द फिर्ता लिइएको वाइसिएल चितवनका संयोजक इश्वर सापकोटाले बताए ।  बन्द फिर्ता भएपछि चितवनको जनजीवन सामान्य बन्दै छ भने राजमार्गमा रोकिएका सवारी साधन पनि गन्तब्य तर्फ लागेका छन् ।

१५ साउन साँझ नारायणगढ बजारमा ब्यापारीसँग चन्दा लिंदै गरेका वाइसीएल कार्यकर्ताहरुलाई प्रहरीले पक्राउ गरेको थियो ।

हाललाई बन्द फिर्ता भए पनि आफ्ना कार्यकर्ता रिहा नभएसम्म आन्दोलन जारी रहने वाइसीएल चितवनले जनाएको छ ।

—————————————————————————————————–

वाईसीएलद्वारा चितवन बन्द

कार्यकर्ता पक्राउको विरोधमा एमाओवादीको भ्रातृसंगठन वाईसीएल चितवनले १६ साउन विहान १० बजेबाट चितवन बन्द गराएको छ ।

हिमालखबर

चन्दा मागेको आरोपमा समातिएका कार्यकर्ता छुटाउन वाईसीएलले १६ साउनमा चितवन बन्द गराएको छ । अहिले चितवनको नारायणगढ क्षेत्रमा यातायात, पसल सबै ठप्प छन् भने पूर्वपश्चिम राजमार्ग भएर यात्रा गर्ने सवारी साधनहरु अलपत्र परेका छन् ।

स्थानीय ब्यापारीसँग चन्दा माग्दै गर्दा १५ साउनमा वडा प्रहरी कार्यालय नारायणगढले वाइसीएलका ६ जना कार्यकर्ताहरु– उत्तम गुरुङ, भरत मगर, विशाल मरहठ्ठा, मधुराज न्यौपाने, मनोजकुमार शेर्पा र रवि पराजुलीलाई पक्राउ गरेको थियो ।

चन्दा माग्दै गर्दा चार जनालाई र पछि वडा प्रहरी कार्यालयमा आक्रमण गर्ने दुई जनालाई समेत गरी ६ जनालई नियन्त्रणमा लिएको वडा प्रहरी कार्यालयका प्रहरी निरीक्षक मदनजीत महराले जानकारी दिए ।

१५ साउन सांझ वाईसीएल कार्यकर्ताले आफ्ना साथीहरु पक्राउ गरेको भन्दै वडा प्रहरी कार्यालयका प्रहरी माथि हातपात गरेका थिए । उनीहरुको आक्रमणबाट प्रहरी जवान मनोज चौहान र प्रहरी सहायक निरीक्षक हेमन्तकुमार सिंह घाईते भएको प्रहरीले जनाएको छ ।

वाईसीएल चितवनका संयोजक ईश्वर सापकोटाले १९ साउनमा हुन लागेको जिल्ला सम्मेलनको लागि सहयोग मागेको पत्र फिर्ता माग्न जाँदा कार्यकर्ता पक्राउ परेको बताए । निर्वाचन आचारसंहिता बन्नुअघि नै आफूहरुले सहयोगको लागि पत्र पठाएको उनले दावी गरे ।

जवरजस्ती चन्दा असुली गर्नु निर्वाचन आचारसंहिता विपरित भएकोले पक्राउ परेकालाई कानून अनुसार कार्वाही गरिने जिल्ला प्रहरी कार्यालय चितवनका प्रहरी उपरीक्षक प्रद्युम्न कार्कीले बताएका छन् ।
सविता श्रेष्ठ, चितवन

प्रतिकृया दिनुहोस