निर्धारित कार्य पूरा गर्न समय अपर्याप्त भएको भन्दै निर्वाचन क्षेत्र निर्धारण आयोगले आफ्नो म्याद अरु १० दिन थप्नका लागि सरकारलाई अनुरोध गरेको छ । आयोगका अध्यक्ष ताहिर अलि अन्सारीले मन्त्रिपरिषद्का अध्यक्ष खिलराज रेग्मीलाई १६ साउन राति भेटेर आयोगको म्याथ थप्ने अनुरोधसहितको पत्र बुझाएको आयोगका प्रवक्ता टेकप्रसाद ढुङ्गानाले बताए ।

आयोगका सदस्य मधुनिधि तिवारीले राजीनामा दिएपछि रिक्त भएको उक्त पदमा चूडाराज उप्रेतीलाई मन्त्रिपरिषद्को १४ साउनको बैठकले नियुक्त गरेको थियो । नयाँ सदस्य उप्रेतीलाई आयोगले हालसम्म गरेका कामकारबाहीबारे अद्यावधिक गर्न र आयोगको निर्णय प्रक्रियमा सहभागी गराउन पनि समय नपुग्ने भएकाले कार्यावधि थपका लागि अनुरोध गर्ने निर्णय भएको प्रवक्ता ढुङ्गानाले बताए ।

आयोगको बुधबारकै बैठकले १० दिन म्याद थप गर्न सरकारलाई अनुरोध गर्ने निर्णय गरेको जानकारी पनि उनले दिए । १९ साउनमा आयोगको कार्यावधि समाप्त हुँदैछ । आयोगले गत ११ असारदेखि काम थालेको थियो ।

प्रतिकृया दिनुहोस