विष्फोटको खतराका कारण १७ बर्ष अघिदेखि चर्चामा आईरहेको च्छो रोल्पा हिमताल विष्फोटको पूर्व चेतावनी सूचना प्रणाली जडानमा संयुक्त राष्ट्रसंघीय विकास कार्यक्रम ९युएनडिपी० र नेपाल सरकारले संयुक्त रुपमा काम शुरु गर्ने भएको छ ।

बृहत विपद् जोखिम ब्यवस्थापन कार्यक्रम अन्र्तगत रोल्वालिङ र लामाबगर भ्यालीमा दुई करोड ५० लाखको लागतमा एक बर्षभित्र अत्याधुनिक पूर्व चेतावनी सूचना प्रणाली जडान गरिन लागिएको यूएनडिपिका कार्यक्रम अधिकृत दिपक केसीले बताए । पूर्व चेतावनी सूचना प्रणालीको सेन्सरले खोला किनारामा पानीको सतह बढ्यो भने बाढी आउने खतराको सूचनालाई जीएसएम र स्याटेलाइटको माध्यमबाट एसएमएस र इमेलमार्फत सूचना दिने गर्दछ । चेतावनी सूचना प्रणालीअन्र्तगत अटोमेटीक र टेलीमेट्रीक गरी दुई प्रकारका मेशिनहरु जडान गरिने केसीले बताए ।

रोल्वालिङ भ्यालीको ना, वेदिङ, रिकु र सिमिगाउँ तथा लामावगर भ्यालीको लामाबगर, गोंगरखोला, जगत, मन्थली, जामुने, सुरीदोभान, भोर्ले र सिंगटीमा अत्याधुनिक मेशिनहरु जडान गरिने छन् । जडान गरिने अटोमेटीक मेशिनले हिमताल आसपासको पानी र हिउँको मात्रा, तापक्रम, तालको सतह वृद्धि र गतिका तथ्याङ्कहरु रेकर्ड गर्ने र टेलिमेट्रिक मेशिनले जिल्ला प्रशासन कार्यालय दोलखाको विपद् व्यवस्थापन समितिमा रहेको साइरन बजेर खतराको संकेत दिने छ ।

इसिमोडले सन् २०११ मा सार्वजनिक गरेको तथ्याङ्कअनुसार हिमताल फुट्यो भने ५ हजार १ सय ८३ जनसंख्या, ३ सय ३१ घरहरु प्रत्यक्ष प्रभावित हुने छन् ।

यसअघि च्छो रोल्पा हिमताल फुट्ने खतरा बढेपछि सन् १९९५ मा साईफन जडान गरी तालको पानी बाहिर फाल्ने काम गरिएको थियो ।
सर्मिला बुढाथोकी, दोलखा

प्रतिकृया दिनुहोस