हेटौंडा ८, कमाने र ६ चौघडामा बर्डफ्लुको संक्रमण भएको पुष्टि भएको जिल्ला बर्डफ्लु समन्वय समितिले जनाएको छ ।

कमानेका हेमबहादुर गुरुङ्गको हिमाली पोल्ट्री फर्म र चौघडाकी शान्ति राईको घरमा पालेको कुखुरामा समेत बर्डफ्लु भएको पुष्टी भएको जिल्ला पशु सेवा कार्यालय मकवानपुरका प्रवक्ता डा. चेतनारायण खरेलले जानकारी दिए ।

२७ साउनदेखि धमाधम कुखुरा मर्न थालेपछि गुरुङ्गले परिक्षणका लागि पशु सेवा कार्यालयमा कुखुरा पठाएका थिए । फर्ममा रहेको करिब एक हजार कुखुरा पाँच दिनमै सखाप भएको उनले बताए ।

त्यस्तै, राईले घरमा पालेका ३६ वटा कुखुरा मरेका छन् । कमानेकै दिपक न्यौपानेको करिब छ सय कुखुरा मरेपनि बर्डफ्लु प्रमाणित नभएको जिल्ला पशु सेवा कार्यालयले जनाएको छ ।

पशु सेवा कार्यालयले कुखुरा परीक्षणका लागि पशु सेवा बिभागको केन्द्रीय पशु रोग अन्वेषण प्रयोगशालामा पठाएको थियो ।

जिल्ला बर्डफ्लु समन्वय समितिको ३१ साउन साँझ बसेको बैठकको निर्णयअनुसार बर्डफ्लु संक्रमण फेला परेको पाँच सय मिटर आसपासका पंक्षी र पंक्षीजन्य पदार्थ नष्ट गरिएको छ ।

कुखुरा व्यबसायी संघ मकवानपुरमा अनुसार जिल्लामा करिब एक हजार तीन सय पोल्ट्री व्यबसायीको झण्डै ४० करोड लगानी छ ।
अशोकसुजन श्रेष्ठ, हेटौंडा

प्रतिकृया दिनुहोस