निर्वाचन आयोगले असार मसान्तसम्ममा १८ वर्ष पुगेकालाई मतदाता नामावलीमा आफ्नो नाम दर्ता गराउन ७५ वटै जिल्ला निर्वाचन कार्र्यालयमा दर्ता कार्यक्रम शुरु गरेको आयोगका प्रवक्ता वीरबहादुर राईले जानकारी दिएका छन् । नामावली दर्ता कार्यक्रम ७ भदौसम्म एकहप्ता जारी रहने छ ।

३१ साउनमा बसेको आयोगका पदाधिकारीको बैठकले पुनः मतदाता नामावली सङ्कलन कार्य शुरु गर्ने निर्णय गरेको थियो ।

मतदाता नामावलीमा आफ्नो नाम नभएकाहरूले संविधानसभाको निर्वाचनमा मतदान गर्न तथा उम्मेरदारसमेत हुन पाउने छैनन् । यसअघि तस्बिरसहितको मतदाता नामावलीमा आफ्नो नाम सूचीकृत गरेकाले भने पुनः दर्ता गर्नुपर्ने छैन ।

४ मंसीमा हुने संविधानसभाको निर्वाचनका लागि आयोगले २०७० असार मसान्तसम्म समयसीमा तोकी तस्बिरसहितको मतदाता नामावली सङ्कलन कार्य गरेको थियो ।

उक्त अवधिमा करिब एक करोड २३ लाख नागरिकको तस्वीरसहितको मतदाता नामावली सङ्कलन भएको थियो । सूचीकृत नामावलीमाथि आयोगले अहिले छानबिन गरिरहेको छ । २२ भदौमा अन्तिम नामावली प्रकाशन गर्ने आयोगको तयारी छ ।

पछिल्लो जनगणनामा नेपालको कुल जनसङ्ख्या दुई करोड ६४ लाख ९४ हजार ५०६ पुगेको छ र यसमा १८ वर्षमाथिको जनसङ्ख्या एक करोड ६४ लाख सात हजार २१३ छ ।

सङ्कलित प्रारम्भिक चरणको मतदाता नामावली र मतदान गर्न योग्य मतादाताबीच तुलना गर्दा अझै पनि करिब ४१ लाख ७८ हजार ८९९ मतदान गर्न योग्य मतदाताले आफ्नो नाम दर्ता गराएका छैनन् ।

असार मसान्तसम्म अन्तिम नामावली दर्ताको समयसीमा तोकेको आयोगले राजनीतिक दल, उच्चस्तरीय राजनीतिक संयन्त्र, मतदाता तथा सरोकारवालाको आग्रहमा यो समयावधि थप गरेको हो ।

रासस

प्रतिकृया दिनुहोस