मलेसियामा विदेशी कामदारहरु काममा जाँदै । फाइल तस्वीर

मलेसिया सरकारले केही दिनदेखि गैरकानूनी रुपमा काम गरिरहेका कामदारलाई पक्राउ गर्न थालेपछि गत २४ घण्टाभित्र करिब २०० नेपाली सहित दुई हजार विदेशी कामदारहरु पक्राउ परेका छन् ।

पक्राउ पर्नेहरुमा नेपाललगायत इन्डोनेसिया, म्यानमार र बङ्गलादेशबाट आएका नागरिक रहेको मलेसियाका गृहमन्त्री अहमद जाहिद हामिदीले बताएका छन् ।

विदेशी गैरकानूनी कामदारलाई पक्राउ गर्ने यो प्रक्रिया यस वर्षको अन्त्यसम्म नै जारी राखिने पनि मन्त्री हामिदीले जनाएका छन् ।

सन् २०११ मा गरिएको अनुसन्धानमा १३ लाख विदेशी कामदार अवैध रुपमा बसिरेका पाइएको मलेसिया सरकारले जनाएको थियो । ती सबैलाई आममाफी दिएर गत वर्ष नै मलेसिया सरकारले घर फर्किन आह्वान गरे पनि लाखौँ कामदारहरु लुकेर काम गरिरहेको मलेसिया सरकारले जनाएको छ ।

मलेसिया सरकारले यसवर्ष सबै गैरकानूनी कामदारहरुलाई नियन्त्रणमा लिने अभियान नै शुरु गरेको छ ।

पक्राउ पर्नेहरुमा सबैभन्दा बढी इन्डोनेसियाली नागरिक छन् । मलेसियामा कामको खोजीमा बर्सेेनि लाखौँ विदेशी नागरिक जाने गर्दछन् ।

सिन्ह्वा

प्रतिकृया दिनुहोस