जिमी (राई) उत्थान समाज सोलुले डा स्वामी प्रपन्नाचार्य (काले राई) को सम्मानमा २८ भदौ दिउँसो आयोजना गरेको कार्यक्रममा मन्त्रिपरिषद अध्यक्ष रेग्मीले कसैले पनि ४ मंसीरका लागि निर्धारित निर्वाचन बिथोल्न चेष्टा गरे त्यो मुलुकका लागि दुर्भाग्य हुने बताएका छन् ।

उनले धर्तीको एक मुठी माटो छातीमा राखेर राष्ट्रियताका लागि कसम खानुपर्ने बेला आएको भन्दै राजनीतिक गतिरोधलाई निकास दिन ४ मंसीरमा हुने संविधानसभा निर्वाचनमा भाग लिन सबैलाई आग्रह गरे ।

डा स्वामी प्रपन्नाचार्यले सनातन धर्ममा लागेर समाजलाई असल बाटोमा डो¥याएको भन्दै सम्मान गरिएको आयोजक संस्थाका अध्यक्ष यसबहादुर राईले बताए ।

काठमाडौँको पशुपतिनाथस्थित मृगस्थलीमा बस्दै आएका प्रपन्नाचार्यले ३० वर्षको उमेरमा आफ्नो अध्ययन शुरुवात गरी वेदान्तमा विद्यावारिधि गरेका छन् ।

राई परिवारमा विसं १९७९ मा पाँचथरको लालीखर्कमा जन्मेका प्रपन्नाचार्यले संस्कृतिका विद्वान मानिन्छन् ।

उनका ‘वेदमा के छ’ ?, ‘किरातहरू मङ्गोलियाबाट आएका होइनन’, ‘मिल्केका झिल्के’, ‘काले राईका क्वाटी’ लगायतका दर्जनौँ कृति प्रकाशित छन् ।

कार्यक्रममा नेपाल प्रज्ञा प्रतिष्ठानका कुलपति बैरागी काइँलाले प्रपन्नाचार्यले सनातन धर्मका ज्ञाता रहेको चर्चा गरे ।

कार्यक्रममा डा चिन्तामणि योगी, प्राडा नोबलकिशोर राई, राष्ट्रिय गीतका रचयिता व्याकुल माइलाले प्रपन्नाचार्यले जीवनका विभिन्न क्षेत्रमा पु¥याएको योगदानका बारेमा चर्चा गरेका थिए ।

रासस

प्रतिकृया दिनुहोस