१० असोजमा धनुषाको कुर्था–६ मा हत्या गरिएका सहप्राध्यापक सत्यनारायण गडेरीको हत्याका अभियुक्तहरु नेपाल विद्युत प्राधिकरण क्षेत्रीय कार्यालय धनुषाका प्रशासकीय अधिकृत लक्ष्मेश्वर राउत, देवडिहा– ३ का ३१ वर्षीय ललन पासवान र २४ वर्षीय नन्दकुमार पासवानलाई जिल्ला प्रहरी कार्यालय धनुषाले सार्वजनिक गरेको छ । प्रहरीले प्रमुख योजनाकार भनेका ३२ वर्षीय राउत धनुषाको बहुअर्वाका स्थायी वासिन्दा हुन् ।

धनुषा साइन्स क्याम्पसमा समेत पढाउने सह–प्राध्यापक सत्यनारायणको शव १० असोजमा घाँटी रेटिएको र छातीमा गोली लागेको अवस्थामा फेला परेको थियो ।

हत्यापछि काठमाडौं भागेका राउतलाई प्रहरीले १२ असोजमा टेकुबाट पक्राउ गरेको हो भने अन्य दुई जनालाई देबडिहा गाउंबाटनै पक्राउ गरेको हो ।

सत्यनारायण गडेरीको हत्याका प्रमुख योजनाकार भनिएका राउत र मृतक गडेरीले संयुक्त रुपमा जनकपुरको बाह्रबिघा नजिक २० धुर जग्गा खरिद गरेको र सोही जग्गा विवादका कारण हत्या गरिएको प्रहरी उपरीक्षक उत्तमराज सुवेदीले जानकारी दिए । खरिद गरिएको जग्गालाई प्लटिङ गर्ने विषयमा दुवैबीच विवाद भएको थियो ।

हत्याका योजनाकार राउतले करिब १५ दिनअघि वैदेशिक रोजगारबाट फर्किएका ललन पासवान र मजदुरी गर्ने नन्दकुमार पासवानलाई १ लाख रुपैंया दिने शर्तमा गडेरीको हत्या गर्न लगाएको प्रहरीले जनाएको छ ।

राउतले पासवानद्वयलाई पेस्तोल खरिद गर्न १८,५०० र आफ्नो मोटरसाईकलसमेत दिई पठाएको अभियुक्तले प्रहरीलाई बयान दिएका छन् ।
मनिका झा, जनकपुर

प्रतिकृया दिनुहोस