फाइल तस्वीर

मन्थलीबाट यात्रु बोकेर साँघुटारतर्फ लागेको बस रामेछाप गाविसको बाबियाखर्कस्थित आइतबारे डाँडामा सडकबाट लगभग १५० मिटर तल खस्दा चार जनाको मृत्यु भएको छ ।

घटनास्थल सदरमुकाम मन्थलीबाट लगभग १० किलोमिटर पूर्वमा रहेको छ । बसमा दशैँका लागि काठमाडौँबाट घर फर्किएका मानिसहरु रहेको बुझिएको छ ।

जिल्ला प्रहरी कार्यालय रामेछापका अनुसार मृत्यु हुनेमा रामेछाप जिल्ला गोठगाउँ गाविस–१ की १९ वर्षीया गोमा भण्डारी र ओखलढुङ्गा जिल्ला कुन्तावेँसीकी अनुशा विकको पहिचान भएको छ भने अन्य दुईको सनाखत हुन सकेको छैन् ।

भण्डारी र विकको रामेछाप सामुदायिक अस्पतालमा उपचारको क्रममा मृत्यु भएको हो । बसमा सवार अधिकांश यात्रु ओखलढुङ्गाका रहेको प्रहरीले जनाएको छ ।

“गाडी स्टार्ट बन्द भयो र पछाडि सर्‍यो, म छतमा थिएँ, छतबाट हामफाले गाडी भीरबाट तल खस्यो, म बेहोस भएछु”– घाइते यात्रु सुशील विकले भने ।

छतमा रहेका अधिकांश यात्रुहरु गाडीबाट हाम फालेर ज्यान जोगाउन सफल भएका थिए ।

घाइतेहरुको मन्थलीस्थित तामाकोसी सहकारी अस्पताल, मन्थली डाइग्नोस्टिक सेन्टर, रामेछाप सहकारी अस्पताल र साहारा सहकारी अस्पतालमा उपचार भइरहेको छ । गम्भीर घाइते ६ जनालाई थप उपचारका लागि काठमाडौँ लगिएको छ ।

प्रतिकृया दिनुहोस