बङ्गालको खाडीमा आएको ‘फाइलिन’ आँधीबेहरीको प्रभावका कारण २७ देखि ३० असोजसम्म लगातार झरी परेपछि दशैंमा कठिनाइ बेहोरेका सर्वसाधारणलाई मौसममा सुधार भएपछि राहत महसुस भएको छ ।

तीन दिनसम्म निरन्तर झरी परेपछि देशका पूर्वी, मध्य, पश्चिम र मध्यपश्चिम भेगको जनजीवन प्रभावित भएको थियो । झरीका कारण मान्यजन र आफन्तकहाँ टीका, जमरा र आर्शिवाद थाप्न गन्तव्यसम्म पुग्नका लागि सर्वसाधारणलाई निकै समस्या परेको थियो ।

वर्षाको प्रभाव पूर्वी भेगमा बढी परेपनि उपत्यकामा पनि पर्याप्त सवारी आवागमन नहुँदा यात्रुले सास्ती बेहोर्नु परेको थियो ।

आजबाट पूर्वीबाहेकका क्षेत्रमा मौसम सफा रहने वरिष्ठ मौसमविद राजेन्द्रप्रसाद श्रेष्ठले बताएका छन् । “पूर्वी र मध्य भागमा आंशिक बदली हुन्छ, तर पानी पर्दैन, पूर्वी भेगमा बढी बादल लाग्नेछ, पश्चिम र मध्यपश्चिम भेगमा भने मौसम सफा छ,” श्रेष्ठले भने ।

जल तथा मौसम विज्ञान विभाग, मौसम पूर्वानुमान महाशाखाका अनुसार आज काठमाडौँको न्यूनतम तापक्रम १८ र अधिकतम तापक्रम २१ डिग्री सेल्सियस रहेको छ ।
रासस

प्रतिकृया दिनुहोस