रुकुम  क्षेत्र नं. २ कांग्रेसका उम्मेदवार गोपालजीजंग शाहको स्वागतका लागि ४ कात्तिकमा आठविसकोटमा जम्मा भएका कांग्रेस कार्यकर्ताहरुमाथि नजिकै कोण सभा गरिरहेका एमाओवादी नेता कार्यकर्ताहरुले ढुंगा प्रहार गर्दा नेपाल तरुण दलका जिल्ला सदस्य जनक बाठा, कांग्रेस आठबिसकोट गाउँ इकाइ सभापति दीपक शाही र एमालेका गणेश सिंह घाइते भएको प्रहरीले जनाएको छ ।

त्यस्तै एमाओवादीले आफ्ना राज्य समिति सदस्य गोरखबहादुर केसीको नेतृत्वमा रहेको चुनाव प्रचार टोलीमाथि कांग्रेस कार्यकताहरुले आक्रमण गर्दा ६ जना घाइते भएको जनाएको छ ।

स्थितिलाई सामान्य बनाउन घटनास्थलमा जिल्ला बाट थप प्रहरी पठाइएको छ । घटानास्थमा सशस्त्र प्रहरीको टोली पनि खटेको छ ।

चुनावी जुलुशको रमाइलो हेर्न पुगेका एमाले समर्थक तीन जना स्थानीय पनि एमाओवादीले प्रहार गरेको ढुंगा लागेर घाइते भएका छन् । जसमध्ये टाउकोमा चोट लागेका गणेश सिंहको अवस्था गम्भीर छ ।

कांग्रेस उम्मेदवारलाई स्वागत गर्न भेला भएका कार्यकताविरुद्ध नजिकै कोणसभा गरिरहेका माओवादी कार्यकर्ताले ‘अराजक र आपत्तिजनक’  नारावाजी गरेपछि झडप भएको कांग्रेस जिल्ला सभापति मानबहादुर नेपालीले बताए ।

दुबै पार्टीको चुनावी कार्यक्रम एकै ठाउँमा परेकाले पनि झडप भएको प्रहरीको भनाई छ ।

सञ्चारमाध्यममा समस्या आएको र घटनास्थल सदरमुकामभन्दा टाढा रहेकोले घटनाको विस्तृत जानकारी नआएको रुकुमका प्रहरी प्रमुख डिएसपी राजेन्द्रप्रसाद भट्टले जानकारी दिए

संविधानसभा निर्वाचनको प्रचारप्रसार अभियानमा व्यस्त र सक्रिय दलहरुबीच रुकुममा दैनिक जसो झडप हुन थालेको छ ।

कांग्रेस र एमाले २०६४ सालमा माओवादी पक्षमा आएको परिणाम उल्टाउन भन्दै जोडतोडका साथ तयारीमा लागेपछि अत्तालिएका एमाओवादी कार्यकर्ता हिंसामा उत्रिएकोे कांग्रेसका जिल्ला सदस्य खड्क डाँगीले बताए ।

“माओवादीको जबरजस्ती र धाँधली यसपटक सहिँदैन,” कांग्रेस नेता एवम् उम्मेदवार गोपालजी जंग शाहले बताए ।

लक्ष्मण केसी, रुकुम

प्रतिकृया दिनुहोस