स्थानीय महिलाको मृत्युको बिषयमा प्रहरीले गरेको अनुसन्धान चित्त बुझ्दो नभएको भन्दै थप अनुसन्धानका लागि दबाब दिन पुगेका स्थानीय र प्रहरीबीच झडप हुँदा प्रहरीको गोली लागि १२ कात्तिकमा चापाकोट गाविस–३, का २५ वर्षीय कृष्ण भट्टराई र सोही गाविस–६ का २१ वर्षका सूर्य आलेको मृत्यु भएको प्रहरीले बताएको छ ।

पश्चिम क्षेत्रीय प्रहरी कार्यालय पोखराका प्रवक्ता डिएसपी जगत कार्कीका अनुसार दुबैको स्थानीय स्वास्थ्य चौकीमा उपचारका क्रममा मृत्यु भएको हो ।

स्थानीय ३५ वर्षकी माया विकको दुई साताअघि भएको शंकास्पद मृत्युको विषयमा प्रहरीले अनुसन्धानमा ढिलाई गरेको भन्दै स्थानीयवासीले प्रहरी चौकीमा आक्रमण गरेपछि भीड हटाउन प्रहरीले अपरान्ह ४ बजे गोली चलाएको थियो । मृत्यु भएका आलेको रत्नपुर प्रहरी चौकी नजिकै भाँडा पसल रहेको स्थानीयबासीले बताए ।

प्रहरीको गोली लागेर गम्भीर घाईते हुनेमा चापाकोट गाविसका गायत्री आचार्य, गंगाकुमारी श्रेष्ठ, कमला श्रेष्ठ र लिलु विक रहेको प्रत्यक्षदर्शीले बताएका छन् । घाईतेहरुको स्थानीय स्वास्थ्य संस्थामा प्राथमिक उपचारपछि थप उपचारका लागि पोखरा ल्याइँदै छ ।

झडपमा रत्नपुर इलाका प्रहरी कार्यालयका प्रहरी निरीक्षक कृष्णबहादुर थापासहित ८ जना सुरक्षाकर्मी पनि घाईते भएको प्रहरीले बताएको छ ।  झडपमा  २४ जना स्थानीयवासी सामान्य घाईते भएका छन् । डिएसपी कार्कीले घटनास्थलमा थप सुरक्षाकर्मी पुगिसेको बताए । चापाकोट गाविस स्याङजा र पाल्पाको सिमानामा पर्दछ ।

विकले आत्महत्या गरेको नभई हत्या भएको हुनसक्ने स्थानीयको दाबी छ ।

माधव बराल, पोखरा

प्रतिकृया दिनुहोस