विगतका चार वटा तिहारमा सयपत्री फूल नहुँदा भाइटीकाको दिन सयपत्रीको माला लगाउन नपाएका सोलुखुम्बुवासीले यस वर्षको तिहारमा सयपत्रीको फूलको मालाले घरका झ्याल ढोकामा समेत झकिझकाउ बनाउन पाएका छन् ।

सयपत्री फूलको बोट कुहिने रोगका कारण बितेका चार वर्षसम्म जिल्लाभर सयपत्री फुलेन । सल्लेरीस्थित साप्ताहिक हाटमा फूल बेच्दै गरेका गोपाल सुनुवार भन्छन, “बितेका चार वर्ष एक थुङ्गा फूल फुलेन, यो वर्ष त आफूले प्रयोग गर्नेमात्र हैन बेचेर पनि नसकिनेगरी फुलेको छ ।”

फूलको अभावमा गएका तिहारमा घरका झ्यालढोका सजाउनका लागि प्लास्टिकको फूलको व्यापार फस्टाएको थियो । तर यस वर्ष भने सयपत्री फूल पाएपछि ग्राहकको रोजाइमा प्लास्टिकको फूल कम परेको छ । सल्लेरीमा प्लास्टिकका फूल बेच्दै आएका राम दास पोहोरको जस्तो ठानेर प्लास्टिकका फूल धेरै ल्याए पनि नबिेको बताउँछन् ।

फूल किन्दै गर्दा सल्लेरीकी शान्ति घिमिरेले भनिन्, “पोहोरको तिहारमा त एक थुङ्गा सयपत्रीलाई रु १०० तिर्छुभन्दा पनि पाइएको थिएन, भाइलाई अरू नै फूल लगाइदिएकी थिएँ, यो वर्ष त चाहेजति फूल पाइएको छ ।”

फूल बेच्दै गरेका मुक्लिका बिरामसिंह राईले भने, “सयपत्रीको बिरुवा नै कुहिएर अब सबैतिरबाट लोप हुन्छ कि जस्तो लागेको थियो, तर यो वर्ष त अहिलेसम्म नदेखेको गरी सयपत्री फुलेको छ ।
रासस

प्रतिकृया दिनुहोस