माओवादीले यसअघि पनि कब्जा गरेको भन्दै अलैची धनीलाई नदिई जबरजस्ती लाने गरेको अलैची यस बर्ष एमाओवादी र नेकपा–माओवादीले भागबण्ड गरी लुटेका छन् ।

अलैची भागबण्डा क्रममा एमाओवादीका कार्यकर्ताले नेकपा–माओवादीका जिल्ला सचिवालय सदस्य लोकमान बोगटीलाई कुटपीट गरेका थिए । दुई माओवादी बिच अलैची लुछाचुडीमा झडप समेत भएको प्रत्यक्षदर्शी जलजला–२ का पासाङ शेर्पाले बताए । लुटपाट गर्ने समूहमा संलग्न नेकपा–माओवादीको जनस्वंयसेवक ५ नं. इलाका इन्चार्ज छिरीङ शेर्पाका अनुसार अलैची उत्पादन कम भएकाले एमाओवादीले करिव ८ मन र नेकपा–माओवादीले करिव ५ मन मात्र हात पारेको छ ।

एमाओवादीका जिल्ला सदस्य कर्ण राई नेतृत्वको टोली र नेकपा–माओवादीका जिल्ला सचिवालय सदस्य लोकमान बोगटीको समूहले स्याब्रुनमा रहेको आफ्नो अलैची लुटेको धनी चैनपुर–२ रामेश्वर श्रेष्ठले बताए ।

बिगत १० बर्षदेखि आफ्नो बारीमा उत्पादित अलैची लिन जाँदा ज्यानकै धम्की आउने गरेको पीडितको गुनासो छ ।

अझै सम्पत्ति कब्जा

एमाओवादीले कव्जा सम्पत्ति फिर्ता गरेको जनाए पनि बर्षेनी अलैची र धान कब्जा गर्न भने छाडेको छैन । गत बर्ष यसै स्थानमा अलैची लिन आएका माओवादीका कार्यकर्तालाई स्थानीय युवाहरुले अवरोध पु¥याएका थिए भने यस बर्ष दुई माओवादीबीच झगडा भएको छ ।

जिल्ला प्रशासन कार्यालयको अभिलेख अनुसार सशस्त्र हिंसाका बेला माओवादीले जिल्लाका १७४ जनाको घरजग्गा कव्जा गरेको थियो जसमध्ये कुनै पनि अहिलेसम्म फिर्ता भएको छैन ।
छेटु शेर्पा, सङ्खुवासभा

प्रतिकृया दिनुहोस