संविधानसभा सदस्य निर्वाचनमा एमाओवादी अध्यक्ष पुष्पकमल दाहालसँग थोरै मतले पराजित एमालेका लीलानाथ श्रेष्ठको उजुरीमाथि सुनुवाई गर्दै संविधानसभा अदालतले आवश्यक कागजातसहित १० दिनभित्र उपस्थित हुन दाहाललाई आदेश दिएको छ ।

संविधानसभा अदालतका अध्यक्ष कल्याण श्रेष्ठ तथा सदस्यद्वय गिरीशचन्द्र लाल र सुशीला कार्कीको इजलासले एमाओवादी अध्यक्ष पुष्पकमल दाहाल, र सिरहा क्षेत्र नं ५ का निर्वाचन अधिकृत उद्धब भट्टराईलाई आवश्यक कागजातसहित उपस्थित हुन आदेश दिएको हो ।

निर्वाचनमा दाहालका प्रतिस्पर्धी रहेका नेकपा एमालेका उम्मेदवार लीलानाथ श्रेष्ठले एमाओवादी कार्यकर्ताले विभिन्न मतदान केन्द्र कब्जा गरी आफूखुसी मत खसालेकाले मतदानको निष्पक्षता र स्वतन्त्रतामा असर पुगेको आरोप लगाउँदै पुनः मतदान गर्न माग गरेका थिए ।

आठवटा उजुरी दर्ता

निर्वाचनमा पराजित विभिन्न निर्वाचन क्षेत्रका पाँच निकटतम प्रतिद्वन्द्वीले संविधानसभा अदालतमा छुट्टाछुट्टै उजुरी दर्ता गराएका छन् ।

मतदान केन्द्र कब्जामा लिएर निर्वाचनमा धाँधली गरेको आरोपसहित पुनः मतदान गराउन र मतगणना दोहो¥याउनुपर्ने माग गर्दै ८ जना पराजित उम्मेदवारहरुले संविधानसभा अदालतमा २१ मंसीरमा उजुरी गरेका छन् ।

उजुरी गर्नेहरूमा सदभावना पार्टीका तर्फबाट सप्तरी–२ का उम्मेदवार नवलकिशोर साह, महोत्तरी–४ का सुरिताकुमारी साह, महोत्तरी–२ का जानकीशरण साह, एमाओवादीका तर्फबाट सिराहा–३ का रामरिझन यादव र नेपाली कांग्रेसका तर्फबाट गोरखा– २ का उम्मेदवार रविकला शर्मा न्यौपाने छन् ।

उनीहरुले ती क्षेत्रबाट विजयी क्रमशः एमाओवादीका अशोककुमार मण्डल, स्वतन्त्र उम्मेदवार चन्देश्वर झा, नेपाली कांग्रेसका किरण यादव, नेपाली कांग्रेसकै सीतादेवी यादव र एमाओवादीका हितराज पाण्डेबिरुद्ध उजुरी दिएका हुन् ।

प्रतिकृया दिनुहोस