अनौपचारिक सेवा केन्द्र (इन्सेक) ले सार्वजनिक गरेको तथ्याङ्क अनुसार सन् २०१३ मा धनुषामा १२ जनाको हत्या भएको छ । सन् २०१२ मा २१ जनाको हत्या भएको थियो ।

त्यसैगरी २०१३ मा १३ जना महिलामाथि बलात्कार एवम् बलात्कारको प्रयास भएको इन्सेकका धनुषा प्रतिनिधि बिनोद महराले जनाएका छन् । २०१२ मा धनुषा जिल्लामा ६ जना महिलामाथि बलात्कार भएको थियो ।

पछिल्ला केही वर्षयता तराईमा मानवअधिकार उल्लंघनका घटनाहरुमा बृद्धि भएको इन्सेकले जनाएको छ । इन्सेकले सार्वजनिक गरेको मानव अधिकार हननका घटनाहरु समेटिएको वार्षिक प्रतिवेदनमा हत्या, अपहरण जस्ता जघन्य अपराध तथा घरेलु हिंसा जस्ता घटनाहरु बढेको उल्लेख गरिएको छ ।

उक्त प्रतिवेदन अधिकांश प्रहरी कार्यालय र मानव अधिकार आयोगमा परेको ऊजुरीको आधारमा तयार गरिएको जनाईएको छ भने ब्यक्तिगत् लेनदेन, घरायशी विवाद लगायतका कारणबाट भएका हत्याका घटनाहरु भने प्रतिवेदनमा समेटिएका छैनन् ।

१५ पुस साँझ जनकपुरमा एक कार्यक्रमको आयोजना गरी इन्सेक धनुषाले वर्ष २०१३ मा कुल १०४ वटा मानव अधिकार हननका घटनाहरु भएको तथ्यांक सार्वजनिक गरेको हो । गत वर्ष सो संख्या १०२ थियो । २१ जना राज्यबाट र ११५ जना गैरराज्य पक्षबाट गरी १ सय ३६ जना पीडित भएको प्रतिवेदनमा उल्लेख गरिएको छ ।

हत्या तथा मानव अधिकार उल्लघंनका मुद्दा प्रहरी कार्यालय मार्फत् अदालतसम्म पुगेपनि अधिकांशको पहिलो सुनुवाई समेत हुन नसकेकोप्रति कार्यक्रमका सहभागीहरुले चिन्ता ब्यक्त गरेका थिए ।

इश्वरचन्द्र झा, जनकपुर

प्रतिकृया दिनुहोस