प्रहरीले युनुस अन्सारीसहित पाकिस्तानी नागरिक मसुद आलम, ओखलढुङ्गा घर भई सीतापाइला बस्दै आएका दिनेश आले, रौतहट घर भई ललितपुरको ताल्छीखेल बस्ने सोहेल खानलाई सार्वजनिक गरेको छ । खान अन्सारीका साला हुन् ।

महानगरिय प्रहरी परिसर काठमाडौँले उनीहरुबाट बरामद पैत्तीस लाख नक्कली भारतीय रुपैयाँ पनि सार्वजनिक गरेको छ । प्रहरीले उनीहरुलाई नक्कली नोटसहित ठमेलस्थित पोताला गेष्ट हाउसको कोठा नम्बर १०४ बाट पक्राउ गरेको हो ।

पाकिस्तानी नागरिक आलम र दिनेश आलेलाई पक्राउपछि बयानको आधारमा अन्सारीलाई पक्राउ गरिएको प्रहरी वरिष्ठ उपरीक्षक सुवोध गौतमले बताए ।

ममाथि षडयन्त्र भयोः अन्सारी

घटनाको प्रमुख अभियुक्त मानिएका अन्सारी भने आफूमाथि षडयन्त्र भएको बताउँछन् । प्रहरी हिरासतमा नैै उनले सञ्चारकर्मीसँग भने, “म टेलिभिजन सञ्चालनको क्रममा थिएँ तर मलाई षडयन्त्रपूर्ण ढङ्गबाट फसाइयो ।” उनले घटनामा आफ्नो संलग्नता नरहेको दाबी गरे ।

यसअघि  अन्सारीले सञ्चालन गरेको  नेशनल  टेलिभिजन उनी जेल परेपछि  बन्द भएको थियो ।

घटनामा नै संलग्न आलेले भने आफूले अन्सारीले लगाएर नै यो काम गरेको सञ्चारकर्मीलाई बताए । उनले यसअघि पनि रु १५ हजार लिएर काम गरेको र दोस्रोपटकमा पक्राउ परेको बताए । आले लागुऔषध खैरो हेरोइन २५ ग्रामसहित पक्राउ परेर १० वर्ष कैद सजाय पाएका व्यक्ति भएको प्रहरीले जनाएको छ ।

अन्सारी यसअघि २०६६ पुस ७ गते थापाथलीस्थित ब्लुस्टार कम्प्लेक्सको कोठा नम्बर ६११ बाट २५ लाख ४४ हजार ५०० नक्कली भारतीय रुपैयाँ र तीन केजी ७०० ग्राम खैरो हेरोइनससहित पक्राउ परेका थिए ।

तीन वर्ष नौ महिना जेल सजाय भोगिसकेका अन्सारीले जेलमा नै आलेसँग भेटेका थिए ।

घटना विवरणअनुसार ९माघमा पाकिस्तानी नागरिक आलम पाकिस्तान एयरलाइन्सको पिके २६८ नम्बरको उडानबाट नक्कली नोटसहित त्रिभुवन अन्तर्राष्ट्रिय विमानस्थलमा उत्रिएका थिए ।

काठमाडौँ झरेपछि उनी ठमेलस्थित पोताला गेष्ट हाउस पुगेका थिए । गेष्ट हाउसमा नै रकम लिन दिनेश आले ठमेल पुगेको र त्यही बेला दुवै जनालाई पक्राउ गरेको प्रहरीले जनाएको छ । आलमले एक हजार दरका तीन हजार ५०० थान नक्कली भारतीय रुपैयाँ शरीरमा बाँधेर लिएर आएको प्रहरीले जनाएको छ ।

प्रहरीले आलमको पाकिस्तान एयरलाइन्सको परिचयपत्र, पासपोर्ट र हवाइ टिकेट तथा खानको नामको भारतीय र नेपाली पासपोर्ट बरामद गरेको छ ।

अन्सारी पक्राउ परेलगत्तै भारतीय नक्कली रुपैयाँको कारोवारमा निक्कै कमी आएको र अन्सारी छुटेलगतै कारोवार बढ्न थालेको काठमाडौँ प्रहरी प्रमुखले दाबी गरेका छन् ।

जेलबाट छुटेपछि यसअघि पनि अन्सारीकै निर्देशनमा एकपटक भारतीय नक्कली नोट नेपाल ल्याइएको र त्यहाँबाट दिल्ली पठाउन सफल भएपछि हौसिएर फेरि कारोबार सुरु भएको प्रहरीको बुझाइ छ ।
रासस

प्रतिकृया दिनुहोस