सुर्खेतको उत्तरगङ्गा–९ की पानकुमारी बोगटी बाङ्गेसिमलस्थित टेम्पो पार्कमा रहेको मिलमा गहुँ पिँध्न आएका बेला दुईजना अपरिचित व्यक्तिले पैसाको लोभ देखाएर सुन चोरेको जिल्ला प्रहरी कार्यालय सुर्खेतले जनाएको छ । दुईजना युवाले झुक्याएर नाटकीय शैलीमा ती महिलाले कानमा लगाएको रिङ र घाँटीको तिलहरी लिएका हुन् ।

मिलबाट फर्किएर टेम्पोपार्क नजिकै पुगेका बेला ती युवाले आफूहरुले रु सात लाख भेटाएको र राख्ने ठाउँ नभएको भन्दै बोगटीसँग रुपैयाँसँग सुन साट्न आग्रह गरेका थिए । ‘हामीहरु तपाईंकै छोराको साथी त हौँ नी’ भन्दै प्रस्तुत भएका ती युवाहरु कापीका पानाहरुलाई नोट जस्तै गरेर बेरिएको नक्कली रुपैयाँको पोको बोगटीलाई दिएर सुन लिएर भागेका हुन् ।

बोगटीले पनि रु सात लाख पाउने भनेपछि कानको रिङ र घाँटीको तिलहरी दिन तयार भएको र पछि अली पर गएर हेर्दामात्रै नक्कली रुपैयाँ भएको थाहा पाएको भन्दै प्रहरीको सहयोग माग्न आएको जिल्ला प्रहरी कार्यालय सुर्खेतले जनाएको छ ।

नक्कली रुपैयाँमा सुन दिएको थाहा पाएपछि उनी त्यहीँ बेहोस भएकी जिल्ला प्रहरी कार्यालय सुर्खेतका प्रहरी निरीक्षक लक्ष्मण शाहीले बताए ।

महिलाले घटनाका बारेमा दिएको जानकारी र हुलियाका आधारमा नक्कली पैसा दिएर गहना चोर्ने एकजनालाई प्रहरीले पक्राउ गरेको छ । वीरेन्द्रनगर–५ कालिका मन्दिरका प्रेम कशेरालाई बाङ्गेसिमलबाट पक्राउ गरिएको शाहीले बताए ।

पक्राउ परेका कशेराले पनि आफू र आफ्ना भिनाजु प्रताव विकले नक्कली रुपैयाँ दिई महिलालाई झुक्याई सुन लिएको स्वीकार गरेका छन् । कशेराका भिनाजु वीरेन्द्रनगर–१ का प्रताव विककोे भने खोजीकार्य जारी छ । कशेराले सुन भिनाजुले नै राखेको बताएका छन् ।

पक्राउ परेका कशेरालाई ठगीसम्बन्धी मुद्दा दायर गर्ने तयारी गरिएको शाहीले जानकारी दिए ।

रासस

प्रतिकृया दिनुहोस