एमाले दाङका जिल्ला कमिटी सदस्य समेत रहेका क्षेत्र नं. ५ का इञ्चार्ज उत्तरकुमार वलीको तुलसीपुरस्थित ‘मनी ट्रान्सफर’ कार्यालयमा काम गर्ने १८ वर्षीया किशोरीलाई बलात्कार गरेको आरोपमा चितवन प्रहरीमा जाहेरी दर्ता भएको छ ।

किशोरीका आफन्तले १४ माघमा दाङको घोराहीमा पत्रकार सम्मेलन आयोजना गरी वलीले २ माघमा काठमाडौं बाट दाङ आउने क्रममा चितवनको दारेचोक गाविस–३ कुरिनटार स्थित रिसोर्टमा किशोरीलाई लगी बलात्कार गरेको बताए ।

किशोरीका आफन्तका अनुसार दाङ श्रीगाउँका स्थायी वासिन्दा ३२ वर्षीय वलीले सञ्चालन गरेको मनी ट्रान्सफर कम्पनीको दाङ शाखामा काम गर्ने किशोरी दिदीलाई भेटन वली परिवारसँगै एक हप्ताका लागि काठमाडौंमा गएकी थिइन् ।

काठमाडौंबाट फर्कदा माईक्रोबसको टिकट लिइसकेकी किशोरीलाई वलीले कलंकीसम्म आफ्नै गाडीमा पुर्‍याइदिने भन्दै कुरिनटारस्थित मनकामना रिसोर्टमा लगेर बलात्कार गरेको पिडित परिवारको दाबी छ ।

वलीले किशोरीलाई घटनाका बारेमा अरुलाई भनेमा मारेर फालिदिन्छु भन्ने धम्की दिएका कारण घटना भएको ५ दिनपछि मात्र प्रहरीलाई भनेको पिडित किशोरीले बताएकी छन् ।

उनीहरुले जिल्ला प्रहरी कार्यालय चितवनमा जाहेरी दरखास्त दर्ता गराईसकेको र नेकपा एमाले जिल्ला कमिटि दाङमा पनि उजुरी दिएको जानकारी दिए ।

अहिले वली विदेशमा रहेको बुझिएको छ ।

बैदेशिक रोजगार ब्यवसायी समेत रहेका वली ४ मंसीरमा सम्पन्न दोस्रो संबिधानसभाको निर्वाचनमा दाङ क्षेत्र नम्बर ५ मा नेकपा एमालेका तर्फबाट संबिधानसभाको उमेदवार थिए । उनी नेपाली कांग्रेसका दिपक गिरीसँग पराजीत भएका थिए ।
देविका घर्ती मगर, दाङ्

प्रतिकृया दिनुहोस