आफ्नो क्लिनिकमा विरामीको उपचार गर्दै डा उमेश प्रसाद

रौतहट टेंग्राहा–४ की ५८ वर्षीया किशुनपतिया देवी अहिले रौतहट शिवनगरको एउटा निजी क्लिनिकमा प्यारालाइसिसको उपचार गराइरहेकी छिन । अत्यधिक जाडोले उनको हात चल्न छोडेपछि उनलाई आफन्तले शिवनगर ल्याएका हुन् ।

किशुनपतियाजस्तै बारा, पटेर्वा–८ की ४५ वर्षीया चन्द्रावती देवीको शरीरको दाँया भाग चल्न छोेडेपछि उपचार भइरहेको छ ।

शिवनगरमा प्यारालाइसिसको उपचारका लागि बारा, रौतहट, सर्लाही र भारत सीतामढीका समेत गरी एक दर्जन रोगी भर्ना छन् । बेडको कमीले भूइँमा समेत राखेर रोगीको उपचार भइरहेको सर्लाहीको बगदह–१का विरामी राजेश यादवले बताए ।

“उच्च रक्तचाप हुनेलाई जाडोमा यस रोगले आक्रमण गर्ने खतरा बढी हुन्छ,” डा. उमेशप्रसाद बताउँछन् । दुधे बालकदेखि दश वर्षका बच्चामा अनुहारको प्यारालाइसिस (फेसियल प्यारालाइसिस) को समस्या देखिएको उनले जानकारी दिए । यसपटकको जाडोमा मात्र करिब ४० जना रोगीको उपचार उनको क्लिनिकमा भएको छ ।

अत्यधिक चिसोले नसामा रक्त प्रवाह नहुँदा प्यारालाइसिस हुने चिकित्सकहरुको भनाइ छ । जिल्ला अस्पताल गौरका मेडिकल अधिकृत डा. कौशर आलम अस्पतालमा न्यूरो फिजिसियन नहुँदा प्यारालाइसिसका बिरामीलाई प्राथमिक उपचार गरी सुविधासम्पन्न अस्पतालमा पठाउने गरेको बताए ।
समयमा उपचार नहुँदा अंगभंग हुने र विरामीको मृत्युसमेत हुने डा. आलमको भनाइ छ ।
सञ्जय साह, रौतहट

प्रतिकृया दिनुहोस