२८ माघ साँझ प्रधानमन्त्री सुशील कोइरालाले त्रिवि पदाधिकारीलाई  त्रिवि चिकित्साशास्त्र अध्ययन संस्थानमा डिन नियुक्त गरी २४ घण्टाभित्र जानकारी गराउन निर्देशन दिएका छन् ।

प्रधानमन्त्री तथा मन्त्रिपरिषद कार्यालयका सचिव कृष्णहरि बाँस्कोटाका अनुसार प्रधानमन्त्री कार्यालयबाट त्रिवि कार्यकारी परिषदलाई संस्थानमा डिन नियुक्त गरी २४ घण्टाभित्र जानकारी दिन पत्र पठाइसकिएको छ ।

प्रधानमन्त्रीको निर्देशनपछि आजै सरकारी वार्ता टोली र अान्दोलनरत चिकित्सकहरुबीच हुने भनिएको वार्ता पनि स्थगित भएको वार्ता टोलीका संयोजक समेत रहेका सचिव बास्कोटाले जानकारी दिए ।

संस्थानमा वरिष्ठताका आधारमा चाँडै डिन नियुक्तिलगायतका माग राखी शिक्षण अस्पतालका वरिष्ठ चिकित्सक प्राडा गोविन्द केसी चार दिनदेखि अनशनमा छन् । डिन नियुक्तिलगायतका माग राखी उनी अनसन बसेको यो चौथो पटक हो ।

त्रिवि कार्यकारी परिषद्ले डिन नियुक्तिका लागि सिफारिस गर्न तीन सदस्यीय ‘खोज समिति’ बनाए पनि समिति सदस्यहरुमाझ कुरा नमिलेपछि सदस्य दीपक महराले राजीनामा दिइसकेका छन् ।

——————————————————————————————————————
सरकार र चिकित्सकबीच वार्ता हुँदै
सरकार र आन्दोलनरत चिकित्साशास्त्र अध्ययन संस्थान (आईओएम)का चिकित्सकबीच वार्ता हुँदैछ ।

शिक्षण अस्पतालका आन्दोलनरत चिकित्सकहरुसँग सरकारद्वारा गठित वार्ता टोलीले वार्ता गर्ने भएको छ । प्रधानमन्त्री सुशील कोइरालाको निर्देशन पछि वार्ता टोलीका संयोजक एवम् प्रधानमन्त्री कार्यालयका सचिव कृष्णहरि वास्कोटाले फोन गरी वार्ताका लागि बोलाएका हुन् ।

चिकित्सा शास्त्र अध्ययन संस्थान (आईओएम) को समस्याबारे वार्ता टोलीले ब्रिफिङ गरे पछि प्रधानमन्त्री कोइरालाले तत्कालै वार्ता गर्न निर्देशन दिएका हुन् । वार्ता २८ माघमै हुने मन्त्रिपरिषद कार्यालयले जनाएको छ ।

सरकारले प्रधानमन्त्री तथा मन्त्रिपरिषद कार्यालयका सचिव कृष्णहरी बास्कोटाको संयोजकत्वमा वार्ता टोली गठन गरेको थियो ।

अनशनरत प्राडा गोविन्द केसीको माग पूरा हुनुपर्ने भन्दै चिकित्सक संघ, प्राध्यापक संघ, रेसिडेन्सियल डक्टर्स एसोसिएसन र मेडिसिन क्याम्पसको स्वतन्त्र विद्यार्थी युनियन आन्दोलनमा छन् ।

उनीहरुको २७ माघमा बसेको संयुक्त बैठकले केसीको अनशनप्रति ऐक्यवद्धता जनाउँदै त्रिवि शिक्षण अस्पतालको आकस्मिक सेवा बाहेकका ओपीडी सेवाहरु बन्द गरेका छन् । उनीहरुले केसीको माग २४ घण्टाभित्र पूरा गर्न पनि अल्टिमेटम दिएका छन् ।

केसीलाई अनशन तोडाउन यस्तो सहमति भएको थियो (पूर्ण पाठसहित)

प्रतिकृया दिनुहोस