पूर्वपश्चिम राजमार्ग अन्तर्गत दमकको हिमालय चियावगान अगाडि १६ फागुन अपराह्न डाँका तथा ज्यान मुद्दाका अभियुक्त राम राई  प्रहारीसँगको मुठभेडमा घाइते भएको जिल्ला प्रहरी कार्यालय झापाले जनाएको छ ।

मोरङको शनिश्चरेस्थित शरणार्थी शिविरमा बस्ने राईमाथि दमकमा बैंक डकैती, मोरङमा सुनपसल लुटपाट र हत्याको अभियोग लागेको छ ।

चियाबगान अगाडिको चिया पसल नजिक रहेका करिब २९ वर्षीय राईलाई सादा पोषाकमा रहेका प्रहरीले शंका लागि बोलाउँदा उनले प्रहरीसँग भएको पेस्तोल खोज्न खोजेको र त्यसक्रममा भएको मुठभेडमा बायाँ कोखामा गोली लागी राई घाइते भएको  प्रहरी उपरीक्षक मुकुन्द आचार्यले बताए ।

घाइते राईलाई दमकस्थित लाइफलाइन अस्पतालमा प्राथमिक  उपचारपछि थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको छ ।

घटनाबारे थप अनुसन्धान भइरहेको प्रहरीले जनाएको छ ।
गोपाल गडतौला, झापा

प्रतिकृया दिनुहोस