बहुपक्षीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को तेस्रो शिखर सम्मेलनमा भाग लिने नेपाली प्रतिनिधिमण्डलको नेतृत्व गर्दै प्रधानमन्त्री सुशील कोइराला १८ फागुनमा त्यसतर्फ प्रस्थान गर्ने कार्यक्रम छ ।

प्रधानमन्त्री कोइरालाले सदस्य मुलुकका राष्ट्र/सरकार प्रमुख सभागी हुने उक्त सम्मेलनलाई सम्बोधन गर्ने छन् ।

सम्मेलनमा बङ्गलादेशमा बिम्स्टेकको स्थायी सचिवालय स्थापना, त्यसको महासचिवमा सुमिथा नाकन्दलाको नियुक्ति तथा भुटानमा सांस्कृतिक उद्योग आयोग र सांस्कृतिक उद्योग अवलोकन केन्द्र स्थापनासम्बन्धी समझदारीपत्रमा हस्ताक्षर हुने परराष्ट्र मन्त्रालयले जनाएको छ ।

बिम्स्टेकले व्यापार तथा लगानी, प्राविधिक, ऊर्जा, यातायात तथा सञ्चार, पर्यटन, मत्स्यपालन, कृषि, प्रतिआतङ्कवाद, अन्तरदेशीय अपराध नियन्त्रण, वातावरण संरक्षण, विपद् व्यवस्थापन, सार्वजनिक स्वास्थ्य, गरिबी निवारण, जलवायु परिवर्तन र जनता जनताबीचको सम्पर्क, विकासका विविध आयाम र साझा चासोका १४ विषयलाई उच्च प्राथमिकता दिँदै आएको छ ।

प्रधानमन्त्री कोइरालाले शिखर सम्मेलनमा भाग लिने क्रममा भारत र बङ्गलादेशका प्रधानमन्त्रीसँग बेग्लाबेग्लै द्विपक्षीय भेटवार्ता गर्ने कार्यक्रम छ । प्रधानमन्त्रीेले विपक्षी नेत्री आङ सान सुचीसँग छलफल गर्र्नुहुने परराष्ट्र मन्त्रालयले जारी गरेको प्रेस विज्ञप्तिमा उल्लेख छ ।

वर्णानुक्रमअनुसार सङ्गठनको अध्यक्षता गर्ने बिम्स्टेकको नियम भएकाले वर्तमान अध्यक्ष मुलुक म्यान्मारबाट तेस्रो शिखर सम्मेलनको समाप्तिसँगै नेपाल अध्यक्ष बन्नेछ । यससँगै चौथो बिम्स्टेक सम्मेलन आयोजना गर्ने दायित्व नेपालमा आउने छ ।

काठमाडौँमा दक्षिण एसियाली क्षेत्रीय सहयोग सङ्गठन (सार्क) को १८ औँ शिखर सम्मेलन भएपछि त्यसको अध्यक्षता पनि नेपालले गर्ने भएकाले बिम्स्टेकमा नेपालको सहभागिता एउटा महत्पूर्ण अवसर भएको छ ।

पारस्परिक लाभका लागि प्रभावकारी क्षेत्रीय सहयोग प्रवद्र्धनका साथै क्षेत्रीय एकीकरण र समृद्धिमा योगदान गर्न नेपालको दृष्टिकोण एमव् क्षमता प्रस्तुतिमा पनि सम्मेलन महत्वपूर्ण हुने ठानिएको छ । प्रतिनिधिमण्डलमा प्रधानमन्त्रीका स्वकीयसचिव, परराष्ट्रमामिला सल्लाहकार, निमित्त परराष्ट्र सचिव, नेपाल सरकारका अन्य वरिष्ठ अधिकारी सहभागी हुनेछन् ।

प्रतिकृया दिनुहोस