स्वास्थ्य चौकीको भवन निर्माणको ठेक्का लिएका ठेकेदार नै सम्पर्कविहिन भएपछि मजदुरहरुले ज्याला रकम नपाएका हुन् । उनीहरुले काम गर्दाको रु. १५ लाख ९३ हजार ८७४ नपाएको बताएका छन् ।

ज्याला रकम पाउनुपर्ने माग गर्दै उनीहरुले जिल्ला प्रशासन कार्यालय प्यूठानमा निवदेन दिएका छन् । स्थानीय ५२ जना मजदुरले ज्याला नपाएको शोभाराम पुनले बताए ।

उनले सबै कामदारको हस्ताक्षरसहितको निवेदन सहायक प्रमुख जिल्ला अधिकारी छविलाल नेपालीलाई बुझाएको जानकारी दिए । उनले भने, “ठेकेदार नै सम्पर्कविहिन भएपछि प्रशासनमा आउन बाध्य भयौं ।”

निर्माणाधिन अवस्थामै अलपत्र प्यूठानको खवाङ स्वास्थ्य चौकी । तस्वीरः विजयसिंह भारती

ठेकेदार भागेपछि निर्माणाधिन स्वास्थ्य चौकी खवाङको भवन अलपत्र परेको छ । ‘नेपाल प्रगती/राप्ती/उच्च हिमालय जेभी’ कम्पनीका ठेकेदार ओमराज बुढाले कर बाहेक रु. ७७ लाख ८८ हजार ६९५ मा स्वास्थ्य चौकी निर्माणको ठेक्का लिएका थिए ।

पन्ध्र महीनाभित्र काम सम्पन्न गर्ने गरी २३ असार ०६८ मा सम्झौता भएको शहरी विकास तथा भवन निर्माण विभाग डिभिजन कार्यालय रोल्पाले जनाएको छ । निर्धारित समयमा काम सम्पन्न नभएपछि ठेकेदारको अनुरोधमा ६ महीना म्याद थप गरिएको डिभिजन प्रमुख सुवास बस्नेतले बताए ।

कार्यालयका लेखा अधिकृत विष्णु भुषालका अनुसार ठेकेदारले रु. ५३ लाख ५२ हजार ९८० भुक्तानी लिइसकेका छन् ।
विजयसिंह भारती, प्यूठान

प्रतिकृया दिनुहोस