सप्तरीको राजविराज नगरपालिका–७ निवासी गुडु अन्सारीकी श्रीमती अन्दाजी २६ वर्षीया नजराना खातुनको बिपी कोइराला स्वास्थ्य विज्ञान प्रतिष्ठान धरानमा उपचारका क्रममा मृत्यु भएको हो ।

आफ्नै घरमा सुतिरहेका बेला २४ फागुन दिउँसो २ बजेतिर शरीरमा आगो लागेर चिच्याउन थालेको आवाज सुनेका स्थानीय जनताले नजराना खातुनलाई उद्धार गरेर उपचारका लागि राजविराजस्थित गजेन्द्रनारायण सिंह सगरमाथा अञ्चल अस्पतालमा भर्ना गराएका थिए ।

त्यहाँ उपचार सम्भव नभएपछि थप उपचारका लागि धरानस्थित बिपी कोइराला स्वास्थ्य विज्ञान प्रतिष्ठान पठाएको र त्यहीँ उपचारका क्रममा राति ११ बजेतिर मृत्यु भएको जिल्ला प्रहरी कार्यालय सप्तरीका प्रवक्ता तथा प्रहरी नायब उपरीक्षक राजकुमार बैदवारले जानकारी दिए ।

आगोबाट उनको करिब ९० प्रतिशत शरीरको भाग जलेको थियो । हत्या गरिएको ठानिएकी नजराना पाँच महिनाकी गर्भवती थिइन् । नजरानाको मृत्युपछि उनकी दुई वर्षीया छोरी रौनक खातुन टुहुरी भएकी छिन् ।

अत्यन्तै मिलनसार र गर्भवती अवस्थाकी नजरानाको मृत्युको खबर पाउनासाथ स्थानीय जनता शोकमा डुबेका छन् ।

नजरानाको छिमेकीसँग राम्रो सम्बन्ध थियो, स्थानीय रैहाना खातुनले भनिन्, “के कति कारणले उनको हत्या गरियो, हामीलाई थाहा छैन, तर जुन किसिमको घटना भयो त्यो घटना दुःखदायी छ ।”

नजरानाका श्रीमान् गुडु अन्सारी करिब १५ दिनअघिमात्र वैदेशिक रोजगारका लागि साउदी अरब पुगेका छन् । नजरानाको घटना रहस्यमय रहेकाले आवश्यक छानबिनका लागि नजरानाकी सासू बानो खातुन र जेठानी नुरजाहा खातुनलाई नियन्त्रणमा लिइएको प्रहरी नायब उपरीक्षक बैदवारले बताए ।

प्रारम्भिक चरणमा नजरानाका सासूको घटनामा संलग्नता रहेको पाइएको र घटनास्थलदेखि करिब ५० मिटरको दूरीमा रहेको पोखरीको डिलमा मट्टीतेलको भाँडो बरामद भएकाले थप अनुसन्धान भइरहेको प्रहरी नायब उपरीक्षक बैदवारले जानकारी दिए ।

प्रतिकृया दिनुहोस