जिल्ला प्रहरी कार्यालय बारामा १५ चैतमा आयोजित पत्रकार सम्मेलनमा प्रहरी महानिरीक्षक उपेन्द्रकान्त अर्यालले वीरगञ्जका प्रहरी वरिष्ठ उपरीक्षक सर्वेन्द्र खानल र बाराका प्रहरी उपरीक्षक इश्वरबाबु कार्कीलाई स्व. विरेन्द्र साहका हत्यारालाई सक्दो चाँडै पक्राउ गर्न निर्देशन दिएका छन् । सम्मेलनमा दुवै प्रहरी अधिकारी पनि सहभागी थिए ।

इनरवा प्रहरी चौकीको उद्घाटन गर्दै प्रहरी महानिरीक्ष्क उपेन्द्रकान्त अर्याल । तस्वीरः बिम्मी शर्मा, वीरगञ्ज

कार्यक्रममा पत्रकारहरुले साहका हत्याराहरु समाजमा खुलेआम घुमिरहेको गुनासो गरेपछि अर्यालले सँगै रहेका एसएसपी खनाल र एसपी कार्कीलाई अपराधीहरुलाई तुरुन्तै पक्राउ गर्न निर्देशन दिएका हुन् ।

उनले साहको हत्या घटना सम्बन्धी अहिलेसम्म भएका अनुसन्धान दस्तावेज अध्ययन गरेर हत्यारालाई पक्रन थप कदम चाल्ने पनि बताए ।

पत्रकार साहलाई बाराको पिपरा बजारबाट अपहरणपछि १८ असोज २०६४ मा हत्या भएको थियो ।

यसअघि अर्यालले कलैयामा आयोजित कार्यक्रममा बोल्दै तराइका जिल्लाहरुमा अपराध घटदै गएको जिकिर गरेका थिए । उनले नेपाल प्रहरीभित्र राम्रो छवी बनाएका प्रहरी अधिकृतहरुलाई तराईका जिल्लामा पठाइने समेत बताए ।

जवानको मेसमा खाना
१४ फागुन राति अर्याल बाराको बरियारपुरस्थित बरियापुर प्रहरी चौकीमा बास बसेका थिए । तल्लो तहका प्रहरीको अवस्था बुझ्न महानिरीक्षक प्रहरी चौकीमा बास बसेको उपरीक्षक इश्वरबाबु कार्कीले बताए ।

उनले जवानहरुकै मेसमा खाना खाएर र उनीहरुको गुनासो सुनेका थिए ।
श्याम गुप्ता, बारा

प्रतिकृया दिनुहोस