सुदूरपश्चिममा माघ, फागुन र चैत महीनामा आपराधिक घटना बढी हुने गरेकोमा यो वर्ष अघिल्ला दुई महीनामा कम भएको देखिएको छ । माघ २०६८ मा सुदूरपश्चिममा १०३ र माघ २०६९ मा १११ आपराधिक घटना भएकोमा यो वर्ष ८५ मात्र भए । फागुन २०६८ मा १०० र फागुन २०६९ मा १२१ घटना भएकोमा यो वर्ष ९९ मात्र भए । सुदूरपश्चिमाञ्चल क्षेत्रीय प्रहरी प्रमुख डीआईजी जयबहादुर चन्द तीनमहीने विशेष सुरक्षा योजना सफल कार्यान्वयन भएकाले अपराध उल्लेखनीय रूपले घटेको बताउँछन् ।

कञ्चनपुर उद्योग वाणिज्य संघका अध्यक्ष गणेशदत्त जोशीको भनाइमा पहिलेभन्दा प्रहरीको सक्रियता बढेकोले आपराधिक घटना कम भएको हो ।

डीआईजी जयबहादुर चन्द ।

सुदूरपश्चिमका ९ पहाडी जिल्लामा रक्सी र जुवा तथा तराईका कैलाली र कञ्चनपुरमा लागूऔषध, तस्करी र सीमा अपराधको समस्या छ । आफ्नो आचरण सुधार गर्दै ती अपराध नियन्त्रण गर्न ‘विशेष सुरक्षा योजना’ ल्याइएको प्रहरीको भनाइ छ । सुदूरपश्चिममा कार्यरत ६ हजार १०० प्रहरीलाई मदिरा सेवन गरे÷नगरेको परीक्षणमा राखेर मदिरा सेवन गर्नेलाई काउन्सिलिङ गर्ने वा सुधार गृहमा राख्ने गरिएको प्रहरी बताउँछ । पहाडमा इन्स्पेक्टर र तराईमा डीएसपीको नेतृत्वमा ‘चेकिङ टीम’ खटाइएको र त्यसको सिफारिशको आधारमा तीन जना प्रहरीलाई निलम्बन गरिएको तथा १७ जनालाई आन्तरिक कारबाही गरिएको प्रहरीको तथ्याङ्क छ ।

सीमा अपराध, लागूऔषध कारोबार र तस्करी नियन्त्रण गर्न कञ्चनपुरमा ‘अपि’ र कैलालीमा ‘सैपाल’ नाम दिएर परिचालन गरिएका टोलीले दुई महीनामा रु.४ करोड बराबरको चोरी–तस्करीको सामान बरामद गरेको प्रहरीको तथ्यांक छ । ‘अपि’ टीमका इन्चार्ज प्रहरी निरीक्षक ज्ञानबहादुर बिष्ट अभियानका क्रममा १८ जना फरार अपराधी पनि पक्राउ परेको बताउँछन् ।

सर्वसाधारण, राजनीतिक दलका नेता–कार्यकर्तासँग नियमित अन्तरक्रिया गर्दै सहकार्य गरिएको यो अभियानका लागि गस्ती गर्ने साइकल अभाव भएर व्यवसायीसँग माग्नु परेको डीआईजी चन्द बताउँछन् ।

बच्चु विक, महेन्द्रनगर

प्रतिकृया दिनुहोस